DÍLI, STLTIMORLESTE.com – Fundasaun Alola, liuhusi Programa Empoderamentu Ekonomiu Feto (ECOEM), organiza Kompetisaun Nasionál Kesi Futus, Kor Natural no Soru Tais, ho partisipasaun husi feto soru-na’in.
Fundasaun Alola organiza kompetisaun ne’e iha Taibesi, Dili, Tersa-feira (10/11/2026), ho objetivu valoriza koñesimentu tékniku, kreatividade no haforsa ekonomia inan-feto soru-na’in.
Kompetisaun ne’e inklui kategoria prinsipál tolu: kesi futus, kor natural no soru tais. Kategoria sira-ne’e avalia téknika, presizaun, preparasaun kor ekolójiku no kualidade arte liman.
Koordenadór Programa Hakbiit Ekonómiku Feto, Mario Barreto, esplika katak kompetisaun ne’e atu valoriza koñesimentu no kreatividade soru-na’in, no haforsa sira-nia ekonomia.
“Objetivu espesífiku liu mak hakbiit no haforsa liután ekonomia ba inan soru-na’in sira,” dehan Mario Barreto ba jornalista.
Nia hatete katak, atividade tinan ne’e aloka ba munisípiu neen, tuir kapasidade orsamentál. Maibé, Covalima la konsege marka prezensa tanba iha atividade kulturál seluk.
Munisípiu sira ne’ebé reprezenta mak Ainaro, Baucau, Bobonaro, Manufahi no Viqueque. Kada munisípiu prepara soru-na’in sira atu partisipa iha kompetisaun.
Orsamentu atividade ne’e mai husi Sekretaria Estadu Arte no Kultura (SEAK), ne’ebé fó apoiu finanseiru US$ 60,000 ba Fundasaun Alola.
Molok kompetisaun, ekipa Fundasaun Alola halo formasaun no fasilitasaun diretamente iha munisípiu, postu administrativu no suku sira ne’ebé partisipante hela.
Formasaun ne’e inklui téknika prepara kor natural husi ai-horis no materiál lokál, atu uza ba kabas, no diversifikasaun produtu tais ba pasta, xapeu, karteira no artesanatu seluk.
Mario esplika katak, partisipante sira rasik lori materiál naturál husi sira-nia munisípiu. Komisaun organiza de’it kabas mutin, enkuantu materiál no kor seluk prepara rasik husi kompetidór sira.
“Ida-ne’e kompetisaun. Sira ida-idak prepara rasik kor husi kada munisípiu, depois ne’e ami haree fila-fali sé mak nia kor di’ak,” dehan Mario.
Atividade kompetisaun ne’e sei kontinua ho programa seluk iha loron 14 to’o 15, nu’udar parte husi esforsu atu promove no dezenvolve kapasidade soru-na’in feto.
Mario mós konvida feto foin-sa’e sira ne’ebé seidauk tama iha rede soru-na’in atu aproxima an ba rede ne’ebé eziste iha munisípiu 12, inklui Rejiaun Administrativa Espesiál Oekusi-Ambeno (RAEOA).
Nia subliña katak, tais nu’udar identidade kulturál Timor-Leste nian, tanba ne’e importante atu kontinua preserva no dezenvolve koñesimentu tradisionál.
Iha parte seluk, sekretária grupu soru-na’in husi Baucau, Agrepina Pereira, manifesta kontentamentu tanba bele partisipa iha kompetisaun ne’e, ne’ebé konsidera nu’udar oportunidade atu atinji mehi grupu nian.
Agrepina konta katak grupu husi Suku Lavateri, Postu Administrativu Baguia, prepara an durante semana rua resin, inklui kesi futus no halibur materiál naturál atu produz kor.
Nia mós hatete katak, tempu bailoro halo prosesu buka ai-tahan no ai-abut sai difísil, tanba presiza tempu atu halibur materiál naturál molok lori ba kompetisaun.
“Ami hatene soru, maibé koñesimentu barak mak ami seidauk hatene, hanesan hakor kabas. Depois kria grupu no tama iha rede soru-na’in, ami bele aumenta koñesimentu no kapasidade,” dehan Agrepina.
Agrepina esplika katak, preparasaun kor natural uza ai-tahan no ai-abut, ne’ebé balun kahur ho ahu-mama no tua-sin atu hetan kor ne’ebé hakarak.
Nia mós afirma katak, formasaun ne’ebé simu ajuda aumenta koñesimentu kona-ba kesi futus no preparasaun kor natural, atu bele fahe fila-fali ba feto sira seluk iha komunidade.
(dom)
