DÍLI, STLTIMORLESTE.com – Laboratóriu Nasionál Saúde normaliza fali stock reajente depois enfrenta falta temporária ne’ebé atraza teste raan ba kandidatu HNGV no pasiente.
Diretór Jerál Laboratóriu Nasionál Saúde, Mário da Costa Coelho hateten katak, sira hetan solusaun temporária liuhusi koordenasaun ho ospitál referál sira.
Nia esplika katak, Laboratóriu Nasionál Saúde rekolla reajente hamutuk 400 husi ospitál rua, inklui Hospital Ermera no Hospital Referál Maubisse.
“Laboratóriu Nasionál Saúde halo koordenasaun ho ospitál referál no sentru saúde sira, hodi rekolla reajente hamutuk 400,” hateten nia ba jornalista iha knar Fatin Bidau, Tersa (10/11/2026).
Maski nune’e, nia konfirma katak prosesu komprasaun reajente kontinua hela iha Institutu Nasionál Farmásia no Produtu Médiku (INFPM).
Problema ne’e mosu tanba nesesidade teste médiku ba kandidatu liu ema 2.000 ne’ebé partisipa iha prosesu rekrutamentu vaga rejime espesiál permanente iha Hospital Nasionál Guido Valadares (HNGV).
Mário hateten katak, Laboratóriu Nasionál Saúde kontinua halo komunikasaun ho INFPM atu asegura disponibilidade reajente iha tempu badak.
Nia salienta katak, maski rejente limitadu, laboratóriu kontinua reserva reajente balu atu atende nesesidade pasiente sira ne’ebé presiza teste raan ba tratamentu.
“Pasiente sira importante, tanba sira nia moras presiza tratamentu. Tan ne’e, ami kontinua asegura reajente ba sira,” nia afirma.
Kona-ba kandidatu HNGV, Mário dehan katak instituisaun sei buka mekanizmu atu asegura rezultadu teste médiku bele disponivel, enkuantu hein prosesu komprasaun husi INFPM.
Iha parte seluk, kandidatu HNGV, Joaquin Soares, haktuir katak atendimentu durante loron rua ne’e la lao ho di’ak tanba númeru kandidatu barak no falta reajente.
Nia dehan katak, kandidatu sira hasai ona raan iha fulan Outubru no simu rezultadu teste, maibé prosesu médiku check-up foin hala’o agora.
“Tanba ema barak no antrean naruk, sistema atendimentu la lao ho di’ak, no reajente mos hotu,” Joaquin Soares dehan.
Joaquin rekomenda ba Laboratóriu Nasionál Saúde atu hadi’a sistema jestaun no prepara fasilidade ho di’ak, hodi asegura prosesu teste médiku ba kandidatu sira iha futuru bele lao ho orden no efisiénsia.
(dom)
