DILI, STLTIMORLESTE.com – Servisu Edukasaun Munisípiu Dili husu ba estudantes husi munisípiu sira seluk atu kontinua eskola iha sira-nia munisípiu rasik, no la presiza mai kontinua estudu iha Dili, tanba eskola sira iha munisípiu ida-idak disponivel.
Diretór Servisu Edukasaun Munisípiu Dili, Sabino Pereira hato’o pedidu ne’e ba STL, Kuarta-feira (11/11/2026).
Nia esplika katak, estudantes husi munisípiu seluk ne’ebé hakarak mai eskola iha Dili sei hasoru kustu ne’ebé boot, no bele aumenta responsabilidade inan-aman nian atu kontrola sira.
“Ita-nia estudantes husi munisípiu sira seluk la presiza mai eskola to’o iha Dili. Se mai iha nesesidade seluk, hanesan tuir inan-aman ka tiu, ne’e kestaun ketak. Maibé ita husu atu sira labele mai Dili atu de’it eskola. Di’ak liu kontinua eskola iha munisípiu rasik, tanba kustu boot no inan-aman mós presiza halo kontrolu,” dehan Sabino.
Nia hatutan katak, kontinua eskola iha munisípiu rasik sei fasil liu ba estudantes no sira-nia família, kompara ho mai eskola iha Munisípiu Dili.
Sabino mós afirma katak, munisípiu sira seluk iha ona instituisaun edukasaun, nune’e estudantes sira bele aproveita oportunidade atu kontinua sira-nia estudu iha área ne’ebé sira hela, hodi evita gastu adisionál ba família.
Tanba ne’e, nia enkoraja inan-aman atu orienta no apoia sira-nia oan sira atu eskola iha munisípiu ida-idak, tuir disponibilidade eskola nian.
(jac)
