DILI, STLTIMORLESTE.com – Sekretáriu Estadu Komunikasaun Sosiál (SEKOMS), Expedito Dias Ximenes informa katak, Timor-Leste sei hili jornalista na’in neen ba kobertura Símu ASEAN ba dala 49 iha Filipina.
Expedito Dias Ximenes hato’o informasaun ne’e iha enkontru ho jornalista no reprezentante mídia públika no privada, iha Palásiu Governu, Kuarta-feira (11/11/2026).
Nia esplika katak, atividade ASEAN sei hahú ho reuniaun téknika, husi loron 12 to’o 14 Novembru, antes kontinua ho enkontru nivel xefe estadu no membru governu.
“Ita hotu hatene katak Timor-Leste sei partisipa iha semináriu ASEAN, ne’ebé hahú ho reuniaun téknika iha loron 12 to’o 14,” deklara Expedito.
Nia afirma katak, delegasaun mídia Timor-Leste kompostu husi jornalista na’in neen no reprezentante mídia na’in haat.
Jornalista sira sei halo kobertura eventu, enkuantu reprezentante mídia públika no privada sei observa preparasaun Media Center.
“Responsavel mídia sira iha knaar importante atu haree kona-ba Media Center, tanba Timor-Leste sei sai uma-na’in iha 2029,” nia informa.
Expedito mós admite katak, limitasaun orsamentál ba tinan 2026 determina númeru jornalista ne’ebé bele partisipa.
Tanba ne’e, delegasaun inklui jornalista husi televizaun públika, televizaun privada no plataforma mídia online.
Nia hatutan katak, iha 2027, Singapura sei sai uma-na’in ba eventu ASEAN, no Timor-Leste sei kontinua partisipa ho jornalista no reprezentante mídia.
“Iha 2027, Singapura sei sai uma-na’in, no Timor-Leste sei kontinua haruka jornalista ba kobertura,” nia deklara.
Entretantu, delegasaun Timor-Leste sei hahú viajen iha tuku 13:00, ho rota Bali no Malázia, antes to’o Filipina atu partisipa iha atividade ASEAN ba dala 49.
(jen)
