DILI, STLTIMORLESTE.com – Eskola Ensinu Baziku Filial (EBF) 12 de Outubro, iha Tasi-Tolu, husu entidade kompetente atu konstrói moru protesaun hodi aumenta seguransa eskola nian, tanba durante períodu feriadu, sasan eskola nian barak lakon.
Pedidu ne’e hato’o diretamente hosi Kordenadór EBF 12 de Outubru, Fernando Barreto ba STL iha nia servisu fatin Tasi Tolu, Kuarta-feira (11/11/2026).
Kordenadór ne’e esplika katak, eskola seidauk iha moru protesaun, nune’e komunidade bele tama no sai livremente iha área eskola nian. Situasaun ne’e halo eskola hasoru risku seguransa, liuliu durante períodu feriadu.
“Ami husu atu halo moru protesaun, tanba ami-nia eskola seidauk iha moru. Komunidade sira bele tama no sai livremente iha eskola, no durante feriadu sasan barak mak lakon. Tanba ne’e, ami presiza moru protesaun atu bele asegura di’ak liu tan ami-nia eskola,” nia dehan.
Nia akresenta katak, konstrusaun moru protesaun importante tebes atu proteje ekipamentu no propriedade eskola nian, liuliu bainhira eskola taka durante feriadu.
Tanba ne’e, Kordenadór EBF 12 de Outubru Tasi-Tolu kontinua hein atu entidade kompetente bele konsidera pedidu ne’e, hodi garante seguransa ba ambiente eskola.
(eme)
