DILI, STLTIMORLESTE.com – Okupantes sira to’o agora seidauk hamamuk eskola 12 iha Munisípiu Dili. Maski nune’e, komunidade sira balun ne’ebé okupa área eskola nian hahú husik ona fatin, tuir informasaun husi Diretór Servisu Edukasaun Munisípiu Dili, Sabino Pereira.
Sabino Pereira hato’o informasaun ne’e ba STL iha nia fatin servisu, Kuarta-feira (11/11/2026).
Nia esplika katak, hosi total eskola 24 ne’ebé okupantes sira okupa, inklui edifísiu Servisu Edukasaun Munisípiu (SEM) Dili, komunidade sira iha eskola neen no edifísiu SEM Dili ida mak hamamuk ona fatin.
Nia hatutan katak, eskola sira ne’ebé komunidade sira hamamuk ona mak Eskola 10 Dezembru, EBC Bidau Akadiruhun, EBF Fatuhada, EBC Sérgio de Mello, EBC Hera, EBF Bemori no EBF Bidau Masaur.
“Lista jerál ne’e ita iha komunidade ne’ebé okupa área eskola nian iha 24 eskola, inklui mós edifísiu SEM Dili. Maibé balun ita muda ona ba sira-nia fatin, hamutuk eskola neen ho edifísiu SEM Dili ida,” dehan Sabino.
Nia dehan katak, iha semana ida-ne’e nia laran, sei kontinua haree no trata prosesu atu komunidade sira ne’ebé seidauk sai bele hamamuk área eskola nian.
Sabino mós temi katak, Eskola Esperansa da Pátria sai ona ezemplu ida, tanba komunidade ne’ebé okupa eskola ne’e hamamuk ona fatin. Nia hein katak komunidade sira iha eskola seluk bele tuir pasu hanesan.
“Eskola Esperansa da Pátria, komunidade hamamuk ona fatin. Nee sai ezemplu mós ba okupantes husi eskola sira seluk. Nune’e, hela de’it eskola 12 mak okupantes sira seidauk sai,” afirma Sabino.
Eskola sira ne’ebé sei iha okupantes inklui eskola sekundária balun, EBF Bebonuk, EBF Aimutin, EBC 30 de Agosto, ESJ 4 de Setembru no Eskola Komérsiu Becora.
(jac)
