DILI, STLTIMORLESTE.com – Eskola Ensinu Báziku Filial (EBF) 12 de Outubro, Tasi-Tolu, sei uza fundu konsesaun eskolár ba nesesidade administrasaun, ijiene eskola, no fotokópia materiál avaliasaun ba estudante sira. Maski fundu ne’e tama ona, maibé to’o agora administrasaun eskola seidauk foti osan refere.
Kordenadór EBF 12 de Outubro, Fernando Barreto konfirma katak, tuir informasaun ne’ebé eskola hetan husi GAT, fundu konsesaun eskolár tama ona. Maibé, prosesu atu foti osan sei hala’o iha semana ida-ne’e ka semana oin.
“Ami konfirma ona ho GAT katak osan tama ona, maibé ami seidauk foti. Dala ruma semana ida-ne’e ka semana oin ami bele foti ona osan konsesaun eskolár ne’e, tanba ami-nia planu prepara ona. Osan ne’e sei uza ba nesesidade ijiene, administrasaun no fotokópia ezame avaliasaun ba estudante sira,” dehan Kordenadór EBF 12 de Outubru, Tasi-Tolu, ba STL, Kuarta-feira (11/11/2026).
Nia afirma katak, utilizasaun fundu konsesaun eskolár sei bazeia ba nesesidade no planu ne’ebé administrasaun eskola prepara ona antes. Ida-ne’e atu asegura katak fundu ne’e uza tuir finalidade no nesesidade eskola nian.
Nia mós hatutan katak, montante fundu konsesaun eskolár ne’ebé simu depende ba númeru estudante sira ne’ebé rejista iha eskola.
(jac)
