DÍLI, STLTIMORLESTE.com – Prezidente Tribunal Rekursu, Afonso Carmona informa katak, lansamentu tribunál iha munisípiu haat remata ona, maibé konstrusaun seidauk hahú tanba falta materiál.
Afonso Carmona hateten ba jornalista sira iha Kaikoli, Sesta-feira (13/11/2026), katak lansamentu ba tribunál iha Baucau, Maliana, Ermera no Viqueque realiza ona. Agora, projetu hirak ne’e hein deit atu tama ba faze konstrusaun.
Nia esplika katak, konstrusaun seidauk hahú tanba materiál konstrusaun balu seidauk disponivel, ne’ebé sai obstákulu ba prosesu implementasaun projetu.
Kona-ba Supremu Tribunal Justisa (STJ), dezeñu foun sei remata iha fulan Dezembru, depois orsamentu aprova ona. Konstrusaun planeia atu hahú iha tinan 2027.
Afonso Carmona hateten katak, dezeñu foun ne’e sei konsidera forma edifísiu ne’ebé ekilibra ho munisípiu sira, atu evita problema iha prosesu konstrusaun.
Dezeñu ne’e sei publika ba públiku atu bele haree no fó komentáriu ka sujestaun, se iha parte ne’ebé presiza hadi’a.
Kona-ba orsamentu, kompañia mak aprezenta proposta kustu tuir dezeñu. Maibé, iha reuniaun, Prezidente Tribunal Rekursu husu atu halo ajustamentu.
Iha parte seluk, kona-ba distribuisaun juíz foun sira, desizaun temporáriu determina katak juíz na’in rua ne’ebé halo avaliasaun ikus iha Oekusi sei fila ba Oekusi. Juíz na’in rua husi Baucau no Suai mós sei fila ba sira-nia fatin servisu.
Enkuantu juíz na’in neen ne’ebé halo avaliasaun ikus iha Tribunál Dili sei kontinua servisu iha Dili.
Afonso Carmona hateten katak, movimentasaun boot ba kolokasaun iha Supremu Tribunal Justisa no Tribunal Rekursu sei realiza iha fulan Dezembru, inklui juíz foun sira ne’ebé foin simu pose.
Nia mós informa katak, iha tinan 2027, Prezidente STJ foun sei simu relatóriu kona-ba orsamentu atu prepara planu no define prioridade instituisaun nian.
Iha parte seluk, akademiku Universidade Nasionál Timor Lorosa’e (UNTL), Sebastião dos Santos, konsidera importante harii tribunál iha munisípiu sira atu aproxima servisu justisa ba komunidade.
“Importante duni estabelese tribunál iha munisípiu sira, atu lori justisa hakbesik ba komunidade sira,” dehan Sebastião dos Santos.
Nia hatutan katak, komunidade ohin loron kontinua iha preokupasaun kona-ba sistema justisa. Tanba ne’e, estabelesimentu tribunál iha munisípiu bele sai hanesan parte ida hodi buka solusaun ba preokupasaun hirak ne’e.
(ter)
