DÍLI, STLTIMORLESTE.com – Kualidade ensinu superior iha Timor-Leste presiza kontrolu no padraun klaru atu asegura graduadu sira iha kapasidade responde merkadu servisu.
Preokupasaun ne’e hato’o husi dosente Fakuldade Siénsia Sosiais (FCS) Universidade Nasionál Timor Lorosa’e (UNTL), Camilo Ximenes Almeida ba STL iha Kampus Kaikoli, Sesta (13/11/2026).
Nia esplika katak, universidade barak iha Timor-Leste produz graduadu iha kada tinan, maibé kualidade no kapasidade graduadu sira nian atu tama no hetan servisu iha merkadu traballu kontinua sai dezafiu.
Nia hatete katak, ema barak kontinua husu kona-ba kualidade ensinu superior no rezultadu ne’ebé universidade sira produz, liuliu kona-ba kapasidade graduadu sira nian atu hetan empregu no kontribui ba dezenvolvimentu nasaun.
“Graduadu barak remata estudu kada tinan, maibé balun la hetan servisu.
Balun buka oportunidade iha instituisaun públika, hanesan Ministériu Saúde no PNTL, balun halo protestu atu buka empregu, no balun seluk buka oportunidade servisu iha Austrália. Ida-ne’e mak realidade ne’ebé ita enfrenta,” nia afirma.
Camilo Ximenes Almeida mós konsidera katak, situasaun ne’e hatudu nesesidade atu iha kontrolu no mekanizmu avaliasaun ne’ebé forte ba instituisaun ensinu superior sira, hodi asegura kualidade edukasaun no kapasidade graduadu sira nian.
Tuir nia, responsabilidade atu hadi’a kualidade ensinu superior la’ós de’it iha universidade sira, maibé mós Ministériu tutela ne’ebé tenke dezenvolve sistema kontrolu no fiskalizasaun ne’ebé efetivu.
Nia enfatiza katak, Timor-Leste presiza estabelese padraun kualidade ensinu superior ne’ebé bele kompara ho padraun internasionál, tanba nasaun tama ona ASEAN no presiza prepara rekursu umanu ne’ebé iha kompeténsia atu konkore iha nivel rejionál no internasionál.
(joa)
