DÍLI, STLTIMORLESTE.com – Akademista Universidade Nasionál Timor Lorosa’e (UNTL) preokupa tanba Governu seidauk nomeia ministru foun ba pasta Ensinu Superiór, Siénsia no Kultura durante fulan neen.
Preokupasaun ne’e hato’o husi akademista UNTL, Camilo Ximenes Almeida ba STL iha Kampus Kaikoli, Sesta (13/11/2026).
Camilo Ximenes Almeida hatete katak, maski Ministru Ensinu Superiór, Siénsia no Kultura anteriór, José Honório da Costa Pereira Jerónimo, mate ona iha 21 Abril 2026, to’o agora Governu seidauk nomeia ministru permanente atu asume pasta MESSK.
Nia konsidera katak, situasaun ne’e hamosu pergunta kona-ba disponibilidade ema ne’ebé iha koñesimentu no kapasidade mínimu atu jere setór ensinu superior iha Timor-Leste, ka karik iha razaun polítika ne’ebé halo prosesu nomeasaun ne’e atraza.
Nia mós husu atu Governu fó atensaun ba responsabilidade lideransa iha ministériu ida-ne’e, tanba pasta ministeriál ne’ebé laiha ministru permanente bele fó impaktu ba implementasaun programa no servisu institusionál.
Tuir nia, Primeiru-Ministru nu’udar xefe Governu tenke asegura katak ministériu hotu-hotu iha lideransa atu bele hala’o knaar ho efetivu, maski prosesu substituisaun tenke respeita sistema koligasaun partidária.
Akademista ne’e mós refere ba Partidu Demokrátiku (PD), ne’ebé iha responsabilidade atu propoin kandidatu foun ba kargu ministru ne’e, tanba ministru anteriór reprezenta partidu refere iha Governu Konstitusionál IX.
Nia konsidera katak, PD iha membru barak ne’ebé iha kapasidade atu jere setór ensinu superior, nune’e prosesu hili kandidatu foun la presiza limita de’it ba ema husi munisípiu ida, maibé tenke haree ba kompeténsia no kapasidade kandidatu sira.
Camilo mós hatete katak, to’o agora Vice-Primeiru-Ministru Mariano Assanami Sabino no Prezidente PD kontinua halo estudu kona-ba kandidatu ne’ebé sei propoin ba kargu ministru refere. Maibé, nia la hatene bainhira prosesu estudu ne’e sei remata.
Antes ne’e, Primeiru-Ministru Kay Rala Xanana Gusmão hato’o deklarasaun katak, Governu Konstitusionál IX harii bazeia ba koligasaun partidária, nune’e prosesu substituisaun membru Governu tenke respeita akordu no prinsipiu koligasaun.
Primeiru-Ministru Xanana Gusmão mós esplika katak, Ministru Ensinu Superiór anteriór ne’ebé matebian reprezenta PD iha Governu, tanba ne’e partidu refere mak iha responsabilidade atu aprezenta kandidatu foun.
“Governu agora ne’e koligasaun. Ministru ne’ebé matebian pertense ba PD, no PD mak atu foti lista mai. Ha’u labele obriga,” Primeiru-Ministru Xanana Gusmão dehan.
Iha parte seluk, Vise-Primeiru-Ministru Mariano Assanami Sabino antes ne’e informa katak, PD iha ona naran kandidatu ne’ebé sei aprezenta ba Primeiru-Ministru no Konsellu Ministru, atu hetan aprovasaun no nomeasaun ofisiál.
Depois Ministru José Honório da Costa Pereira Jerónimo mate, Primeiru-Ministru Kay Rala Xanana Gusmão nomeia Vice-Primeiru-Ministru Mariano Assanami Sabino atu kaer pasta MESSK nu’udar ministru interinu.
Ministériu Ensinu Superiór, Siénsia no Kultura iha responsabilidade importante atu dezenvolve ensinu superior, promove siénsia no hametin dezenvolvimentu kultura iha Timor-Leste.
Tanba ne’e, akademista ne’e hein katak Governu no PD bele rezolve lalais prosesu nomeasaun ministru foun, hodi asegura kontinuidade lideransa no dezenvolvimentu setór ensinu superior iha nasaun.
(joa)
