FILIPINA, STLTIMORLESTE.com – Ministru Negósiu Estranjeiru no Kooperasaun, Bendito dos Santos Freitas, partisipa iha Reuniaun Ministru Negósiu Estranjeiru ASEAN ba dala-59.
Tuir Prezidénsia Sekretária Negósiu Estranjeiru Filipinas, Maria Theresa P. Lazaro hatete asesu katak,reuniaun ne’e hala’o iha Manila, Filipinas, iha loron 14 Novembru 2026, enkontru ne’e halibur ministru negósiu estranjeiru hotu-hotu hodi analiza progresu konstrusaun Komunidade ASEAN no hametin relasaun externa.
Nia dehan, Ministru sira diskute mós dezenvolvimentu rejionál no internasionál, nu’udar preparasaun ba Simeira ASEAN ba dala-49 no enkontru relasionadu sira.
“Ita diskusaun foka ba unidade, sentralidade no reziliénsia ASEAN, iha situasaun incerteza jeopolítika no dezafiu seguransa rejionál,”hatete Prezidénsia Sekretária Negósiu Estranjeiru Filipinas, Maria Theresa P. Lazaro ba jornalista sira iha Manila-Filipina loron sabadu (14/11/2027).
Nia informa asuntu seluk inklui Tratadu Amizade no Kooperasaun iha Sudeste Aziátiku (TAC), parseria externa, situasaun Myanmar no kooperasaun marítima.
Iha fatin Ministru Negósiu Estranjeiru no Kooperasaun, Bendito dos Santos Freitas agradese Filipinas nia lideransa ba ASEAN durante tinan 2026 no reafirma Timor-Leste nia kompromisu atu kontribui ba prioridade komún ASEAN.
Nia mós saúda Protokolu Cebu ne’ebé altera Karta ASEAN no atualizasaun Emblema no Bandeira ASEAN, nu’udar símbolu Timor-Leste nia adezaun plena.
Timor-Leste sai Estadu-Membru ASEAN ba dala-11, ho responsabilidade atu hametin kapasidade institusionál no aprofunda integrasaun rejionál.
Iha nia intervensaun, Ministru Negósiu Estranjeiru no Kooperasaun, Bendito dos Santos Freitas subliña katak kredibilidade ASEAN depende ba kapasidade Estadu-Membru sira transforma kompromisu sai rezultadu konkretu.
(jen)
