DÍLI, STLTIMORLESTE.com – Inspektór eskolár sira iha Munisípiu Dili kontinua hala’o monitorizasaun ba atividade edukasaun iha eskola sira, tuir orientasaun ne’ebé Superintendente Edukasaun fó, atu asegura prosesu aprendizajen no implementasaun programa merenda eskolár lao ho di’ak.
Diretór Servisu Edukasaun Munisípiu Dili, Sabino Pereira, hateten ba STL, Segunda-feira (16/11/2026), katak monitorizasaun ne’ebé inspektór eskolár sira hala’o durante ne’e lao tuir orientasaun husi superintendente, no to’o agora la hetan problema signifikativu.
“Hau hanoin monitorizasaun ne’ebé hala’o husi ita-nia inspektór eskolár sira ne’e lao hanesan baibain, hamutuk ho sira-nia superintendente. To’o agora sira-nia servisu lao di’ak tebes, tanba inspektór sira hala’o servisu tuir orientasaun ne’ebé superintendente fahe ba sira,” nia dehan.
Iha parte seluk, Diretór Servisu Edukasaun Munisípiu Likisá, Júlio da Silva, dehan katak inspektór eskolár sira kontinua hala’o monitorizasaun ba atividade edukasaun iha eskola sira, inklui implementasaun programa merenda eskolár.
“Durante ne’e, ita-nia inspektór eskolár sira nafatin hala’o monitorizasaun ba atividade ne’ebé hala’o iha eskola sira. Inspektór balun hala’o monitorizasaun iha ensinu pré-eskolár, ensinu báziku, tékniku-vokasionál no ensinu sekundáriu, tuir sira-nia área servisu ida-idak,” nia esplika.
Júlio kontinua esplika katak, monitorizasaun ne’e inklui atividade prosesu aprendizajen, implementasaun programa merenda eskolár no atividade hotu-hotu ne’ebé hala’o iha eskola sira.
Iha nune’e, Superintendente Edukasaun Munisípiu Dili, Cesarina C. Guterres, mós afirma katak inspektór eskolár sira iha responsabilidade atu monitoriza atividade edukasaun iha eskola ida-idak.
“Hau hanoin ita-nia inspektór eskolár sira ne’e mak hala’o monitorizasaun ba eskola sira, tanba sira monitoriza prosesu aprendizajen, merenda eskolár, nune’e mós atividade seluk ne’ebé hala’o iha eskola ida-idak,” nia informa.
Enkuantu ne’e, Diretór EBC Manleuana, Carlos Correia, hateten katak inspektór eskolár sira bainhira vizita eskola, halo verifikasaun ba implementasaun programa merenda eskolár, atu haree se menu ne’ebé eskola prepara tuir duni menu ne’ebé determina ka lae. Aleinde ne’e, sira mós monitoriza prosesu aprendizajen iha eskola.
“Hau hanoin ita-nia inspektór eskolár sira ne’e mai iha ami-nia eskola atu haree se merenda eskolár lao tuir menu ne’ebé iha ka lae, no mós halo monitorizasaun ba prosesu aprendizajen iha eskola,” nia dehan.
(jac)






