MSSI Intervén Ba Idozu iha Baguia

Idoza Maria Rodrigues. (Foto: STL/Emerenciana Pinto)

DÍLI, STLTIMORLESTE.com – Ministériu Solidariedade Sosiál no Inkluzaun (MSSI), liuhusi Sentru Solidariedade Munisipál Baucau, hamutuk ho tékniku Postu Administrativu Baguia, halo ona intervensaun ba Idoza Maria Rodrigues, tinan 75, no nia la’en Lorenso Ximenes, tinan 72.

Intervensaun ne’e akontese hafoin kondisaun moris katuas-ferik na’in rua ne’e viral iha mídia sosiál, ne’ebé hamosu preokupasaun públika kona-ba sira-nia situasaun sosial no umanitária.

Diretór-Jerál Protesaun Sosiál, Florencio Pina Dias Gonzaga, hatete katak MSSI orienta kedas ekipa iha Munisípiu Baucau atu halo levantamentu no intervensaun iha terenu.

“Ekipa akompaña hela no fasilita ona apoiu ai-han. Apoiu kontinua sei depende ba avaliasaun no rekomendasaun téknika iha terenu,” dehan nia ba jornalista iha salaun MSSI Kaikoli, Segunda (16/11/2026).

Nia esplika katak, ekipa téknika kontinua monitoriza kondisaun moris no saúde Maria Rodrigues, atu identifika nesesidade adisionál sira.

MSSI mós mantém komunikasaun ho servisu saúde, atu fasilita asesu ba tratamentu médiku, karik iha nesesidade no asesu ba saúde sai difísil.

Florencio afirma katak, apoiu governu agora daudaun foka ba nesesidade bázika, inklui ai-han no apoiu komplementár ba katuas-ferik na’in rua ne’e.

Entretantu, família Duarte Rodrigues hatete katak katuas-ferik na’in rua ne’e hela mesak, tanba sira la iha oan no la hakarak sai todan ba família.

Xefe Aldeia Alawa, Duarte Rodrigues afirma katak, família iha responsabilidade atu tau matan ba sira, maibé enfrenta limitasaun ekonómika.

Nia esplika katak, kondisaun uma nian aat liután hafoin asidente iha tinan 2023, ne’ebé limita kapasidade família atu halo servisu todan.
“Sira nain rua ne’e garante de’it osan ba ai-han no hemu, maibé laiha kapasidade atu harii uma di’ak,” Duarte Rodrigues afirma.

Nia mós informa katak, Maria Rodrigues sofre avariamentu saúde tanba stroke, ne’ebé afeta nia movimentu, liuliu ain rua no liman karuk.

Tuir Duarte, autoridade suku aprezenta ona situasaun família ne’e ba autoridade munisipál, inklui pedidu konstrusaun uma no apoiu materiál.

Ekipa husi Gabinete Prezidente Repúblika mós vizita ona família ne’e atu rekolla dadus kona-ba kondisaun moris no haree possibilidade apoiu.

Maibé, to’o agora, família seidauk simu rezultadu kona-ba pedidu apoiu ne’ebé hato’o ona.

Responsável Asuntu Sosiál Postu Administrativu Baguia, Virgilio Soares Freitas, hatete katak iha tinan 2025, instituisaun ne’e rekolla ona dadus no evidénsia kona-ba kondisaun uma no moris katuas-ferik na’in rua ne’e.

Nia afirma katak, informasaun refere haruka ona ba instituisaun relevante iha nivel nasionál atu konsidera apoiu ne’ebé presiza.

(dom)

Share it :

Leave a Reply

Your email address will not be published. Required fields are marked *