AMBENO, STLTIMORLESTE.com – Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu dehan, Zona Ekonomia Espesiál ba Dezenvolvimentu Oecusse-Ambeno (ZEEDOA) nu’udar mekanizmu estratéjiku atu promove investimentu, dezenvolve empreendedorizmu no diversifika ekonomia iha Oecusse.
Regio da Cruz Salu hato’o deklarasaun ne’e iha Salaun Alfândega, 1 de Maiu, Palaban, Oecusse, Sesta-feira (13/11/2026).
Nia esplika katak, ZEEDOA no parque industriál tenke bazeia ba prinsípiu jerál orientadór, responsabilidade institusionál no kooperasaun entre Governu, instituisaun parseira no setór privadu, hodi kria ambiente favorável ba investimentu.
Tuir nia, Governu iha obrigasaun institusionál atu asegura implementasaun mekanizmu ne’ebé suporta dezenvolvimentu zona ekonómika, tuir mandatu konstitusionál no enquadramentu legál ne’ebé vigora.
Nia akresenta, Zona Ekonomia Espesiál iha relasaun ho estratéjia dezenvolvimentu nasionál, inklui esforsu atu hametin ekonomia merkadu, promove empreendedorizmu no konsolida oportunidade ekonómika iha rejiaun.
Regio da Cruz Salu konsidera katak, ZEEDOA tenke sai instrumentu ida atu atrai investimentu no haburas setór produtivu, liuliu turizmu, agrikultura, produsaun no indústria.
Nia subliña mós importánsia atu integra ekonomia Oecusse no Timor-Leste ho merkadu rejionál, inklui merkadu ASEAN, hodi aumenta oportunidade ba produtu lokál no empreza sira.
Iha kontestu ne’e, dezenvolvimentu parque industriál no zona ekonómika presiza akompaña ho planeamentu, koordenasaun institusionál no implementasaun polítika públika ne’ebé klaru, atu garante katak investimentu bele kontribui ba kresimentu ekonómiku no dezenvolvimentu rejionál.
Iha fatin seluk, Frederico Texeira nuudar Prezidente Camara Comersiu Industria Timor Leste (CCI-TL) iha RAEOA, dadaun nee halo ona preparasaun atu hahu halo lansamentu investimentu karau baka husi Oecusse ba Dili, atu halo exportasaun ba rai liur, tanba iha Oecuse karau baca barak maibe faan ho sistema tradisioal deit, dala ruma povu Oecusse faan ba Dili liu husi Ro berlin Ramelau ho ro Succes irmao Timor, maibe karau baka ida rua deit.
“Ohin ami hasoru Prezidente Autoridade RAEOA, hodi planu halo lansamentu investimentu karau iha Portu Internasional Iwao Kitahara Mahata Oecusse iha tempu badak, nunee bele diversifika ekonomia povu iha Oecusse,” dehan nia.
Nunee mos Domingos Colo nuudar povu Oecusse, husu ba emprezariu lokal sira atu investe iha setor riil neebe fo benefisiu direita ba povu nia moris, laos hadau malu projetu investimentu publiku husi estadu deit.
(jos)






