Komunidade Uma-Kain 8 Kee Bee iha mota

AMBENO, STLTIMORLESTE.com – Tempu bailoron naruk no Rai Manas makaas iha ilha Timor, afeta bee-matan sira iha fatin hotu-hotu inklui Bairo Neof-Upat, Aldeia Pune, Suku Usitasa’e, Postu administrativu Oésilo Rejiaun Adminstrativa Espesiál Oecusse Ambeno (RAEOA), bee matan maran, obriga komunidade uma-kain 8 deside kee bee posu iha mota Nifufeob hodi supa bee ba sira ho distansia kilometru 2.

Haktuir Komunidade Miguel Metan ba jornalista sira iha Oecusse, Segunda nee (16/11/2026) informa katak bee maran ona, sira uma-kain 8 deside ke’e bee-posu iha mota hodi dada bee sa’e ba Bairo Neof-Upat, atu bele fasilita ba konsumu loron nian.

“Durante ne’e ami mai kuru de’it iha mota ki’ik ida iha bairo laran maibé agora maran ona, nune’e ami deside hamutuk mai buka fali iha mota ne’e, maibé tanba lori bee husi mota ba uma do’ok liu, entaun ami ho inisiativa kee bee posu ida atu dada ba uma,” nia hateten Miguel Metan.

Nia informa, difikuldade konaba bee moos, iha sira nia bairo enfrenta tinan barak ona inklui problema elétrisidade, tanba Governu seidauk tau matan ba sira, tanba nee mak uma kain 8 ho inisiativa rasik, hamutuk tau osan hodi sosa fiu elétrisidade no dada husi viziñu ho distansia kilometru 1.

“Ami laiha apoiu husi autoridade ruma, mezmu ahi eletrisidade no bee moos, ami uza rasik ami nia kbi’it mak dada bee ho eletrisidade,” haktuir Metan.

Iha fatin ketak, Xefe Bairo Neof-Upat, Domingos Poto Colo reforsa-tan katak, bee-moos importante atu fasilita uma laran no mós ba animál sira, tanbá ne’e ho inisiativa ke’e rasik bee-posu hodi kanaliza bee moos ne’e husi mota ninin ho distansia kilometru 2 sa’e ba komunidade atu bele uza.

“Iha tinan kotuk sei di’ak, tanba ami iha bee-matan balu hodi utiliza no halo jestaun to’o tempu udan, maibé tinan ida ne’e maka bee-matan sira maran hotu, atu kee oinsa mós la hetan ona bee, ne’e maka ami organiza malu mai ke’e besik mota ninin atu dada sa’e ba bairru laran,” nia hateten.

Antes nee, Komandante Operasional Autoridade Protesaun Civil (APC) RAEOA, Joao da Silva Sila dehan, kauza El Niño 2026-2027, dadaun bee matan maran iha fatin-fatin.

“Ami husu ba povu Oecusse, atu preparadu hasoru situasaun elnino tanba rai manas makaas, afeta ba bee matan maran iha fatin-fatin,” dehan nia.

Nia mos husu ba Povu Oecusse atu labele sunu rai no tesi ai horis arbiru iha foho lolon neebe fornese bee ba bee matan sira.

(jos)

Share it :

Leave a Reply

Your email address will not be published. Required fields are marked *