DILI, STLTIMORLESTE.com – Ministériu Solidariedade Sosiál no Inkluzaun (MSSI) aloka rihun US$ 450 hodi sosa foos saku 27.272 ba família vulnerável iha munisípiu 13.
Diretór-Jerál Protesaun Sosiál MSSI, Florêncio Pina, hateten katak programa ne’e implementa iha tinan 2026, ho objetivu atu ajuda família vulnerável sira ne’ebé hasoru difikuldade asesu ba ai-han.
Haktuir nia ba STL iha nia knaar-fatin, Kaikoli, Dili, Segunda-feira (16/11/2026).
Tuir Florêncio Pina, distribuisaun foos ba munisípiu sira determina bazeia ba nesesidade família vulnerável ne’ebé ekipa téknika identifika iha terenu.
Iha munisípiu Aileu, governu aloka foos saku 1.808, Ainaro saku 775 no Ataúro saku 1.000.
Munisípiu Covalima hetan foos saku 1.494, Baucau saku 3.446, Bobonaro saku 3.330 no Dili saku 2.259.
Enkuantu munisípiu Ermera hetan foos saku 887, Liquiçá saku 1.541, Lautém saku 2.709 no Manatuto saku 1.976.
Iha parte seluk, munisípiu Manufahi hetan foos saku 1.558, RAEOA saku 2.100 no Viqueque saku 2.389.
Distribuisaun ne’e iha objetivu atu asegura família vulnerável sira hetan asesu ba ai-han komplementár, hodi responde ba nesesidade konsumu loroloron.
Florêncio Pina esplika katak, MSSI sei loke tender públiku ba kompania sira ne’ebé iha interese atu partisipa iha prosesu sosa foos.
Kompania ne’ebé liu prosesu seleksaun sei responsabiliza atu fornese foos, inklui foos importadu, ba MSSI.
Identifikasaun família benefisiária bazeia ba rezultadu levantamentu ekipa téknika iha terenu no pedidu husi autoridade lokál, inklui xefe suku sira.
Programa apoiu ne’e sei kobre sidadaun vulnerável hamutuk 30.203, kompostu husi feto 16.313 no mane 13.891.
MSSI mós implementa pakote apoiu iha item 9, ho orsamentu totál US$553.381.
Apoiu ba inan isin-rua no inan fó-susu
Aleinde programa foos, MSSI mós implementa apoiu ai-han, foos, mina no masin ba inan isin-rua, inan fó-susu no labarik idade fulan neen to’o tinan tolu.
Iha RAEOA, benefisiária sira inklui inan isin-rua na’in 171, inan fó-susu na’in 601 no labarik na’in 1.238.
Iha Munisípiu Covalima, apoiu ba inan isin-rua na’in 54, inan fó-susu na’in 144 no labarik idade fulan neen to’o tinan tolu na’in 322.
Enkuantu iha munisípiu Ermera, inan isin-rua na’in 499 no inan fó-susu ho labarik idade fulan neen to’o tinan tolu hamutuk na’in 2.845.
(dom)






