Bee Sai Preokupasaun Komunidade Gariwai

Foto Ilustrasaun

BAUCAU, STLTIMORLESTE.com – Bee sai nafatin preokupasaun ba komunidade Suku Gariwai, tanba durante semana rua laasesu ba bee, tánba sistema bee problema, maibé agora sistema funsiona fali.

Preokupasaun ne’e hato’o husi Xefe Suku Gariwai, Armindo Belo Freitas, ba STL iha Gariwai, Segunda (16/11/2026).

Nia esplika katak, durante semana rua nia laran, komunidade enfrenta difikuldade asesu ba bee moos tanba sistema pompa bee nian hetan problema, ne’ebé afeta distribuisaun bee ba komunidade.

Armindo dehan katak, sistema pompa bee nian ne’e fornese bee ba aldeia neen, mak Darasula, Waibe Hana, Kairiri, Maucale, Waturou no Gariwai.

Nia afirma katak, bainhira sistema pompa ne’e avaria, komunidade hasoru difikuldade tanba tenke hein autoridade relevante, liuliu BTL, SAS , atu haruka tékniku halo reparasaun ba ekipamentu ne’ebé estraga.

Tanba situasaun ne’e, komunidade relata problema ba Diretór SAS Baukau.

Depois simu informasaun, iha loron rua nia laran, tékniku sira mai halo reparasaun ba sistema pompa ne’e.

Ho nune’e, agora sistema pompa bee nian funsiona fali no bee hahú fornese ba komunidade.

Iha parte seluk, komunidade Suku Gariwai, Adelina Moniz, dehan katak durante semana rua nia laran bee la-sai, maibé agora bee hahú mai fali, nune’e komunidade bele uza fali bee ne’e ba nesesidade loro loron.

Adelina haktuir katak, komunidade sente triste no hasoru difikuldade boot bainhira bee la-sai, tanba bee nu’udar nesesidade importante ba moris loroloron.

Maski nune’e, nia agradese ba autoridade lokál ne’ebé hato’o problema ba entidade relevante, to’o tékniku sira halo ona reparasaun no bee mai fali ba komunidade.

Xefe Suku Gariwai ne’e subliña katak, problema avaria sistema pompa bee nian sai todan ba komunidade, tanba bainhira ekipamentu ne’e hetan problema, presiza hein tékniku atu halo reparasaun, ne’ebé durante ne’e afeta asesu komunidade ba bee moos.

Suku Gariwai iha aldeia hamutuk 8 mak Bahamori, Kairiri, Darasula, Gariwai, Maucale, Waibe Hana, Uatuwa no Waturou.

(joa)

Share it :

Leave a Reply

Your email address will not be published. Required fields are marked *