AMBENO, STLTIMORLESTE.com – Atendimentu emisaun pasaporte sai hanesan fonte reseita importante ba Diresaun Rejionál Servisu Rejistu no Notariadu iha Rejiaun Administrativa Espesiál Oecusse-Ambeno (RAEOA), ne’ebé rejista reseita hamutuk US$ 61.775 durante períodu Janeiru to’o Outubru 2026.
Informasaun ne’e hato’o husi Diretór Rejionál Servisu Rejistu no Notariadu RAEOA, Julio Coel, ba STL, iha nia knaar-fatin, Santa Rosa, Suku Costa, Postu Administrativu Pante Macassar, Segunda-feira (16/11/2026).
Julio Coel esplika katak, durante períodu fulan sanulu ne’e, instituisaun ne’ebé nia lidera kontinua fornese atendimentu públiku regular iha área rejistu sivíl, emisaun dokumentu identidade, rejistu kriminál, pasaporte no servisu notariadu.
Iha área rejistu sivíl, atendimentu sira inklui rejistu moris, emisaun sertidaun moris, rejistu kazamentu no emisaun sertidaun kazamentu. Aleinde atendimentu iha edifísiu, instituisaun ne’e mós hala’o atividade rejistu móvel durante fulan Jullu no Agostu 2026.
Programa rejistu móvel ne’e estende ba Postu Administrativu Nitibe, Pasabe no Oesilo, ho kobertura ba suku hamutuk 10, atu aproxima servisu públiku ba komunidade sira, liuliu sidadaun ne’ebé hasoru difikuldade atu asesu diretamente ba servisu rejistu.
Enkuantu iha área notariadu, atendimentu ne’ebé fornese inklui autentikasaun no legalizasaun dokumentu, rekonhesimentu asinatura, preparasaun eskritura públika no sertifikasaun deklarasaun.
Tuir Julio Coel, dokumentu sira ne’e iha importánsia boot ba sidadaun, tanba sai hanesan rekizitu fundamentál iha prosesu administrativu, edukasaun, viajen no nesesidade seluk iha moris loroloron.
Tanba ne’e, Serbisu Rejionál Serbisu Rejistu no Notariadu kontinua fó prioridade ba atendimentu públiku, atu garante katak sidadaun sira bele asesu ba dokumentu nesesáriu, inklui sertifikadu nasionalidade no sertidaun rejistu kriminál.
Fasilita Emisaun Sertidaun Moris
Aleinde reseita ne’ebé hetan husi servisu pasaporte, Diresaun Rejionál Serbisu Rejistu no Notariadu RAEOA mós kontinua fó atensaun ba rejistu moris no emisaun sertidaun moris durante períodu Janeiru to’o Setembru 2026.
Julio Coel dehan katak, liuhusi atendimentu regular no programa rejistu móvel, instituisaun ne’e esforsu atu fasilita sidadaun sira hetan dokumentu sivíl ne’ebé nesesáriu, no asegura katak prosesu rejistu moris hala’o tuir prosedimentu legál.
Nia enfatiza katak, dokumentu sivíl la’ós de’it prova identidade sidadaun ida-nian, maibé mós sai baze importante ba asesu ba direitu no servisu públiku sira.
(jos)






