Presiza Prepara Rekursu Umanu

Estudante ICS tuir formasaun. (Foto: STL/Jeniche da Costa)

DILI, STLTIMORLESTE.com – Timor-Leste presiza prepara rekursu umanu kualifikadu no hadi’a kualidade edukasaun superior, atu responde ba kompetisaun iha rejiaun ASEAN.

Reitór Institutu Siénsia Saúde (ICS), Leão Borges hato’o deklarasaun ne’e ba STL, Tersa-feira (17/11/2026).

Nia hateten katak, Timor-Leste nu’udar membru ASEAN, presiza kontinua hadi’a kualidade edukasaun superior atu bele kompete ho nasaun seluk.

“Agora ita tama ona membru ASEAN, ita tenke kompete maka’as no prepara rekursu umanu,” nia esplika.

Leão subliña katak, dosente no estudante sira presiza kontinua aprende no partisipa iha formasaun, liuliu iha lian Inglés, atu aumenta kapasidade iha merkadu traballu.

Nia mós husu instituisaun ensinu superior sira atu hadi’a fasilidade no kondisaun aprendizajen, hodi garante edukasaun ho kualidade.

Iha parte seluk, Reitór Dili Institute of Technology (DIT), Salustiano dos Reis Piedade, hateten katak instituisaun ne’e kontinua investe iha dezenvolvimentu rekursu dosente sira.

Nia esplika katak, DIT haruka dosente sira kontinua estudu iha nivel maestradu no doutoramentu, tuir kapasidade finanseira instituisaun nian.

“Kuaze dosente DIT hotu-hotu iha ona nivel maestradu, no ami kontinua haruka sira ba doutoramentu,” nia dehan.

Salustiano hatutan katak, DIT mós fó atensaun ba hadi’a laboratóriu, atu estudante sira bele kombina aprendizajen téoriku ho prátika.

Nia dehan katak, instituisaun ne’e kontinua hadi’a sistema jestaun internu no dezenvolve kuríkulu, atu hasa’e kualidade hanorin no atendimentu ba estudante sira.

Salustiano informa katak, DIT iha dosente hamutuk 137, kompostu husi profisionál ho kualifikasaun diferente.

Husi total ne’e, dosente na’in lima mak iha titulasaun doutóradu, na’in 17 iha nivel doutoramentu, no na’in 12 kandidatu doutoramentu.

Enkuantu iha nivel maestradu, dosente na’in 70 iha titulasaun ne’e, na’in 7 kandidatu maestradu, no na’in 27 iha nivel lisensiatura.

(jac)

Share it :

Leave a Reply

Your email address will not be published. Required fields are marked *