DILI, STLTIMORLESTE.com – Teste entrevista ba kandidatu 2.072 ne’ebé pasa teste eskrita iha prosesu rekrutamentu vaga permanente HNGV sei hahú semana ida-ne’e.
Prezidente Komisaun Rekrutamentu HNGV, Vidal de Jesus Lopes, hatete katak ekipa Funsaun Públika prepara hela lista no oráriu entrevista.
Nia informa katak, kandidatu sira tenke tuir loron no oras ne’ebé determina, tanba prosesu entrevista la realiza iha loron ida de’it.
“Teste entrevista ne’e sei dura durante semana tolu, ho loron efetivu servisu hamutuk 15 dias,” dehan Vidal de Jesus Lopes ba jornalista iha HNGV Bidau, Tersa (17/11/2026).
Nia katak, husi kandidatu 2.072 ne’ebé tama fase entrevista, komisaun sei hili de’it kandidatu 478 ba faze final rekrutamentu.
Vidal esplika katak, prosesu entrevista bele hahú iha loron Kuarta ka Kinta, depois ekipa publika rezultadu reklamasaun hamutuk ho oráriu entrevista.
Antes tama fase entrevista, kandidatu sira iha direitu atu halo reklamasaun tuir prosedimentu legál. To’o agora, komisaun simu ona reklamasaun hamutuk 24.
Komisaun sei analiza no verifica reklamasaun ida-idak antes fó resposta ba kandidatu sira. Rezultadu reklamasaun sei publika hamutuk ho oráriu entrevista.
Reklamasaun sira ne’e inklui preokupasaun kona-ba rezultadu teste, pontuasaun no alegasaun seluk relasiona ho prosesu rekrutamentu.
Antes ne’e, kandidatu vaga Médiku Jerál Júnior A1-CP1 kontesta rezultadu teste eskrita tanba suspeita irregularidade.
Kandidatu Atanásio Flores alega katak prosesu rekrutamentu iha indikasaun favoritizmu, nepotizmu no familiarizmu.
Nia mós afirma katak, iha indikasaun matéria teste distribui ba kandidatu balun ne’ebé iha relasaun besik ho membru komisaun.
Porta-voz kandidatu sira, Danio Ximenes afirma katak, sira iha evidénsia, inklui fotografia no mensajen WhatsApp, atu suporta alegasaun irregularidade.
Tanba alegasaun hirak-ne’e, kandidatu sira husu atu anula rezultadu teste eskrita no suspende prosesu rekrutamentu to’o autoridade kompetente halo verifikasaun.
(dom)






