PNTL Asegura Suspeitu Halo Agresaun Fíziku Hasoru Estudante Feto

Foto: Espesial

DILI, STLTIMORLESTE.com – Polísia Nasionál Timor-Leste (PNTL) asegura suspeitu ida ne’ebé alegadamente agríde estudante feto ida iha área Eskola Cristal, Dili, depois vítima rejeita pedidu atu tuir suspeitu.

Akontesimentu ne’e akontese iha loraik, besik tuku 17:00, bainhira vítima remata atividade eskolar no prepara atu fila ba uma hamutuk ho kolega sira.

Tuir informasaun preliminár, vítima ne’ebé atu sae bemo alegadamente hetan abordajen husi suspeitu, ne’ebé mak nia namoradu.

Suspeitu husu vítima atu tula ho nia, maibé vítima lakohi tuir pedidu ne’e.

Hafoin rejeisaun ne’e, suspeitu alegadamente uza save motor atu baku vítima iha ulun, hodi halo vítima sofre kanek no presiza tratamentu médiku.

Depois komete agresaun, suspeitu halai hosi fatin akontesimentu. Ekipa Servisu Sekreta Makikit, Komandu Munisípiu Dili, hahú buka tuir suspeitu.

Liuhusi informasaun no pista sira ne’ebé disponivel, ekipa Makikit konsege lokaliza no asegura suspeitu ne’e.

“Ekipa Makikit konsege lokaliza no asegura suspeitu, ba Esquadra PNTL Vera Cruz atu halo prosesu investigasaun tuir lei,” haktuir nota komunikadu imprensa ne’ebé STL sita hosi Relasaun Públika Ministériu Interiór, Sábadu (21/11/2026).

Suspeitu identifika ho inisiál A.R.G., mane tinan 21, ne’ebé alegadamente iha relasaun ho vítima.

Enkuantu vítima ho inisiál V.A.X. mak estudante feto ida iha Eskola Cristal.

PNTL kontinua investiga kazu ne’e atu klarifika kronolojia no motivu akontesimentu, inklui rekolla evidénsia no depoimentu husi parte relevante sira.

PNTL apela ba komunidade, liuliu joven sira, atu rezolve problema liuhusi diálogu no respeitu, la’ós ameasa ka violénsia.

PNTL reafirma kompromisu atu prevene no kombate violénsia kontra feto, no asegura katak kazu sira-ne’ebé envolve violénsia sei trata tuir lei.

(alb)

Share it :

Leave a Reply

Your email address will not be published. Required fields are marked *