DÍLI, STLTIMORLESTE.com – Jesus Kristu sai ezemplu lideransa verdadeira, tanba Nia sakrifika Nia moris atu salva humanidade no hatudu domin ba ema hotu.
Lia hirak ne’e hato’o husi Padre Paulus Maya Liu, liu husi omilia bainhira prezide misa iha Katedral Dili, Domingu (22/11/2026).
Padre Paulus esplika katak, Domingu ikus iha tinan liturjia nian, Igreja Katólika selebra Solenidade Kristu Liurai ba universu tomak. Selebrasaun ne’e konvida fiéis atu reflete kona-ba Jesus Kristu nu’udar Alfa no Ómega, tempu nia hun no rohan, ne’ebé ukun Lalehan no Rai.
Nia hateten katak, primeira leitura husi Profeta Ezequiel aprezenta Maromak nu’udar bibi atan ne’ebé iha responsabilidade boot atu tau matan ba ninia bibi sira. Ezemplu ne’e hatudu katak lideransa presiza kompromisu no responsabilidade ba ema ne’ebé entrega konfiansa ba lider.
Tuir Padre Paulus, responsabilidade lider ida nian tenke manifesta liuhusi hahalok no asaun konkretu, la’ós de’it liuhusi liafuan ka pozisaun ne’ebé nia okupa.
Nia mós subliña katak, lideransa la’ós de’it iha nivel Estadu, Governu ka instituisaun, maibé inklui família, komunidade no bairro. Tanba sai lider signifika asume responsabilidade boot no kumpre konfiansa ne’ebé ema seluk entrega.
Nia observa katak, Timor-Leste enfrenta krize lideransa, nune’e lider sira presiza hatudu ezemplu di’ak liuhusi servisu, responsabilidade no kompromisu ba komunidade.
Iha parte seluk, Padre Paulus refere ba segunda leitura husi karta São Paulo ba komunidade Korintu, ne’ebé esplika katak liuhusi Adão ema hotu mate, maibé liuhusi Jesus Kristu ema hotu hetan moris.
Nia hateten katak, Jesus Kristu nu’udar Liurai no Salvador sai modelu lideransa ne’ebé fó esperansa, unidade, dame no moris di’ak ba humanidade, tanba Nia la’ós de’it ukun, maibé moris hamutuk ho ema no komprende sira nia realidade.
Padre Paulus mós esplika katak, Jesus tama iha realidade moris ema nian atu haree no sente diretamente sira nia susar, hahalok no maneira moris.
Iha realidade, ema ida-idak iha karakter diferente; balun hatudu domin no laran-di’ak, maibé balun la hatene hadomi, halo sakrifísiu ka fó atensaun ba ema seluk.
Nia enfatiza katak, sakrifísiu mak parte importante husi lideransa Jesus nian, tanba Nia entrega nia moris rasik ba ema seluk, hodi sai ezemplu domin no servisu ba humanidade.
Iha remata, Padre Paulus lembra fiéis katak hahalok no asaun ema ida-idak nian iha mundu sei sai sasukat iha julgamentu ikus.
Ema ne’ebé halo di’ak no hatudu domin ba ema seluk sei hetan fatin di’ak, maibé sira ne’ebé kontinua halo buat aat sei hasoru konsekuénsia husi sira nia hahalok.
(joa)






