DILI, STLTIMORLESTE.com – Aban estudante husi Eskola Baziku Filial (EBF) Fatumeta hahu asesu ona programa merenda eskolar ba anu letivu 2025.
Haktuir Koordenador Eskola Baziku Filial (EBF) Fatumeta, Jose Manuel Pires ba STL iha nia knaar fatin Fatumeta, Kinta nee (30/01/2025).
“Kona-ba merenda eskolar, ohin seidauk bele hahu, maibe ohin hahu prepara fatin, tanba ita hatene katak durante nee merenda eskolar nee seidauk lao, estudantes no profesores sira mos ferias, agora mak foin atu hahu implementa programa ida nee, maibe aban nee hahu lao ona, ohin sei prepara fatin, atu nunee aban nee ema komesa tein ona ba ita nian estudantes sira han,” dehan nia.
Nia dehan, estudantes neebe mak asesu merenda eskolar nee hamutuk 904, menu neebe mak uza ba programa merenda eskolar nee lao tuir menu neebe antes nee estabelese ona, tanba menu nee mai husi Ministeriu Saude, bainhira atu halo mudansa ba menu nee kompetensia husi ministeriu neebe relevante.
“Maibe menu nee sempre lao tuir orariu neebe mak iha, tanba nee ema neebe mak tein iha ami nian eskola nee tuir menu neebe mak iha, no labele ses husi menu neebe mak antes nee ami uza tiha ona ba ano letivu foun 2025 nee, aban mak ita foin implementa programa merenda eskolar ba ita nian estudante sira,” nia esplika.
Nunee mos Rosa Maria Nunes, hanesan estudante hatete, loos duni katak, depois de feriadu sira seidauk asesu merenda eskolar, maibe tuir informasaun neebe iha aban hahu implementa ona merenda eskolar, no estudantes sira hahu asesu hikas programa ida nee.
“Depois de feriadu ami seidauk asesu merenda eskolar, maibe tuir informasaun neebe iha, aban hahu implementa ona merenda eskolar, no estudantes sira hahu asesu hikas programa ida nee, tanba nee ami sente kontente bele asesu fali merenda eskolar,” nia haktuir.
(jac)