DILI, STLTIMORLESTE.com – Aban loron Sesta (26/06/2026) estudantes sira sei la halao prosesu ensinu aprendizajen, tanba sei ba partisipa misa nomos hamriik iha estrada ninin hodi fo omenajen ba Saudozu eis PR Francisco Guterres Lu-Olo.
Lia hirak nee hatoo husi Diretor Eskola Hotelaria no Turizmu Becora, Charles F. Guterres ba STL iha nia knaar fatin, Kinta nee (25/06/2026).
“Aban nee ami nian estudante mai iha eskola, maibe la iha prosesu aprendizajen, tanba ami nian estudantes sira sei tuir misa no hamriik iha estrada ninin hodi fo omenajen ba ita nian eis Prezidente Republika RDTL, Francisco Guterres Lu-Olo, nee duni aban laiha prosesu aprendizajen ba ita nian estudantes sira,” nia informa.
Diretor Eskola Hotelaria nee sublina, tanba nee aban dader estudantes no profesores sira sei ba partisipa misa eis PR Francisco Guterres Lu-Olo ninian, nunee aprendizajen laiha, tanba profesores no estudantes sei ba partisipa iha misa depois sei ba hamriik iha estrada ninin hodi fo omenazen ba saudozu.
Iha parte ketak, Diretor Eskola Sekundariu Nobel da Paz, Jeremias P. de Jesus hatete, aban estudantes sira hotu sei uza sira nian farda hodi mai iha eskola para bele ba partisipa misa saudozu eis Prezidente Republika nian mate isin, depois de partisipa iha misa, estudantes sira sei hamriik iha dalan ninin hodi fo omenajen ba saudozu eis PR Francisco Guterres Lu-Olo.
“Hau hanoin aban nee ita nian estudantes sira hotu sei uza sira nian farda hodi mai iha eskola, para bele ba partisipa misa saudozu eis Prezidente da Republika nian mate isin, depois de partisipa iha misa, estudantes sira sei hamriik iha dalan ninin hodi fo omenajen ba saudozu eis PR Francisco Guterres Lu-Olo,” nia informa.
Nia afirma, profesores neebe iha atividades nee sira hela iha eskola, maibe hirak neebe mak laiha nee tenke akompanha estudantes ba partisipa misa, tanba loron ida deit mak laiha ensinu aprendizajen nee diak hela, tanba profesores no estudantes sira hotu sei mai partisipa iha misa no sei hamriik iha estrada ninin.
“Ami fo informasaun ona ba ami nian estudantes sira katak, aban hotu-hotu uza farda eskola nian mai partisipa iha misa saudozu eis Prezidente Republika ninia, hafoin misa ami sei hamriik iha estrada ninin,” dehan nia.
Entretantu Nuno de Jesus nuudar estudante husi Eskola Sekundariu Nobel da Paz hatete, aban sira sei ba partisipa misa ba saudozu eis PR nian, tanba sira simu ona informasaun katak, aban estudantes sira hotu sei partisipa iha misa no hamriik iha dalan ninin hodi fo presta omenajen ba saudozu eis PR.
“Aban ami sei ba partisipa misa ba saudozu eis PR nian, tanba ami simu ona informasaun katak aban estudantes sira hotu sei partisipa iha misa no hamriik iha dalan ninin hodi fo omenazen ba saudozu eis PR,” tenik nia.
(jac)
