DÍLI, STLTIMORLESTE.com — Klubu voleibol feto AD SLB manan Klubu Fitun Lorosa’e ho rezultadu 3-0, iha kompetisaun Liga Voleibol Timor-Leste Primeira Divizaun Époka 2026, ne’ebé hala’o iha kampu voleibol Ginásiu Díli, Segunda-feira, 19/10/2026.
Iha partida ne’e, ekipa feto rua hatudu jogu kompetitivu liuhusi servisu, passing, smash no bloku. Maibé, AD SLB konsege domina partida no manan set tolu tuir malu.
Iha set primeiru, AD SLB no Fitun Lorosae hahú partida ho intensidade aas. Ekipa rua halo esforsu atu buka pontu liuhusi atake no defeza ne’ebé metin. Maski Fitun Lorosae koko atu fó rezisténsia, AD SLB konsege organiza jogu ho di’ak no manan set primeiru ho pontu 25-19.
Tama ba set segundu, AD SLB kontinua hatudu dominasaun liuhusi servisu, passing no bloku ne’ebé efetivu. Ekipa ne’e konsege aumenta distánsia pontu no taka set segundu ho rezultadu 25-16, hodi lidera partida ho rezultadu set 2-0.
Iha set datoluk, Fitun Lorosae aumenta intensidade jogu iha parte defeza no atake atu buka oportunidade hodi muda rezultadu. Maibé, esforsu ne’e seidauk natoon atu para AD SLB nia dominasaun.
AD SLB kontinua joga ho konsentrasaun no konsege manan set datoluk ho pontu 25-21, hodi taka partida ho rezultadu final 3-0.
Ho vitória ne’e, AD SLB hatudu prestasaun ne’ebé forte iha kompetisaun Liga Voleibol Timor-Leste Primeira Divizaun Époka 2026, depois de manan set tolu hasoru Fitun Lorosae.
Iha sorin seluk, apoiantes sira ne’ebé marka prezensa iha kampu voleibol Ginásiu Díli fó animasaun ba ekipa rua durante partida. Ambiente iha pavilhaun sai animadu, ho apoiu husi adeptus sira ne’ebé kontinua akompaña jogu to’o remata.
(leo)
