DILI, STLTIMORLESTE.com – Atividade jogu online ilegal neebe buras iha rai laran presiza hetan asaun seriu husi Ezekutivu. Akademista sira sujere ba Governu atu foti pasu radikal hodi blokeia sitiu ka pajina web no aplikasaun jogu online ilegal hotu neebe mak opera hela iha rai laran, hodi labele fo impaktu aat ba moris diak no mentalidade jerasaun foun.
Tuir Akademista UNPAZ, Bosco da Costa, meus neebe efisiente liu mak hapara kedan, asesu ba rede komunikasaun dijital neebe fasilita tebes atividade kriminal nee.
Nia dehan, atuasaun iha terrenu deit la too, tenke hahu husi mundu dijital. Governu liu husi Autoridade Nasional Telekomunikasaun tenke fo mandatu klaru ba operadu hotu (Telcomcel, Timor Telecom, Telemor) hodi tesi no blokeia internet protokolu husi sitiu jogu hirak nee.
Bainhira pajina web sira nee labele labele ona asesu husi rede internet Timor-Leste, labarik no joven sira sei labele tan lakon osan no tempu ba jogu ilegal nee.
“Ita labele hein deit Polisia ba kaer ema iha liur. Solusaun primeiru no lais liu mak Governu tenke mai ho politika dijital neebe rigorozu, blokeia situ hotu neebe promove jogu online ilegal,”dehan Bosco ba STL, Segunda nee (13/07/2026).
Akademista nee hatutan katak, preokupasaun nee labele haree deit ba ekonomia família nian, maibe tenke hateke mos ba saude mental labarik sira nian neebe lakon interese ba estudu tanba dependensia ba jogu online ilegal nee.
Iha parte ketak Antigu Deputadu Husi Bankada Partidu Sosial Demokrata (PSD), Leandro Isaac, hatete lideransa nasional sira mak iha responsabilidade prinsipal atu fo orientasaun hodi kombate atividade nee, maibe too agora seidauk hatudu asaun real hodi kombate atividade nee. Tuir nia, iha tempu neebe povu hasoru terus boot, lider sira falta inisiativa hodi salva rai nee husi impaktu negativu atividade ilegal.
Iha nia komentariu, Antigu Deputadu nee kritika postura elite sira nian neebe nia deskreve nuudar interese partikular, iha neeba sira ho fasil deit halo negosiasaun hodi hetan benefisiu privadu.
“Ita fo aan ba mate, sira basa liman, hamnasa, no ikus mai sira mak sai heroi neebe salvaguarda situasaun,” dehan Leandro.
Entretantu iha loron hirak nee, imajen no video sira neebe hatudu Polisia Nasional Timor Leste liuhusi Diresaun Servisu Investigasaun Krimina (DSIK) kaptura sidadaun estranjeiru, liuliu sidadaun Xina sira neebe involve iha jogu online ilegal iha Dili laran, sai viral makas iha media sosial hanesan Facebook no TiTtok. Publikasaun sira nee hetan atensaun boot husi publiku, neebe hatoo kritika no preokupasaun konaba oinsa fasilmente sidadaun estranjeiru sira nee bele halao atividade ilegal iha rai laran, hodi hamosu debate publiku neebe boot konaba kontrolu migrasaun no integridade Estadu nian.
(car)
