DILI, STLTIMORLESTE.com – Daudaun nee sidadaun balun halao asaun ladun edukativu neebe kontinua hadau ema nia sasan, hanesan kartera, telefone no sasan seluk tan, presiza regras forte atu regula.
Tuir Deputadu husi Bánkada PD, Armando Lopes katak, aktu neebe sidadaun balu halo née aktus krime.
“Hau dehan krime tanba asaun ida nee laiha Inan Aman ida eduka oan atu halo ida née, relijiaun mos la hanorin, maibe talves kabun obriga mak halo sira naok, mas laos naok telefone no sasan sira liu husi hadau iha motor leten. Maske kabun obriga mos ida nee laos dalan atu sira halo, sei iha dalan seluk neebe mak atu buka osan”, kestiona Deputadu Armando ba STL iha PN, Tersa (03/12/2024).
Nia hatete, karik bazeia ba sira nia problema sosial mak obriga sira, maibe nuudar sidadaun joven mane klosan tenke buka dalan oinsa bele hetan osan, maibe mos dalan neebé sira halo risku boot ba sira, ida nee tanba dala ruma mos ema balun nia karakter mak nunee, tanba nee presiza regulamentu ida neebe forte hodi regula, sidadaun balu neebe ladun iha moral, edukasaun, hodi hein deit ema iha dalan bá hadau ema nia sasan iha motor leten.
Nia lamenta, karik mos tanba kampu Servisu menus, tanba nee joven sira envolve aan iha asaun sira hanesan née, tanba née presiza iha mos kampu servisu neebe boot hodi akomula joven sira nee atu haree servisu.
Tuir nia, seguransa sira mos presiza kontrola, maibe regras nee mak tenke forte, nunee seguransa sira kaer ema hanesan née bele kriminaliza.
(gui)
