DILI, STLTIMORLESTE.com – Tribunal Judisial Primeira Instansia Dili (TJPID) iha Sesta (03/07/2026) realiza julgamentu ba krime Ofensas Integridade Fizika Simples neebe mak komete husi arguidu inisial FA hasoru lezadu inisial AdA.
Tuir akuzasaun katak, iha loron 18 Janeiru 2026, maizumenus tuku 8:45 dader, iha bar jus Niken iha Bairo Pite, arguidu FA no lezadu AdA envolve iha diskusaun relasiona ho pasajen liu husi fatin determinadu.
Iha diskusaun nee nia laran, FA ho hirus makaas hakat ba AdA nia diresaun hodi tuku iha nia liman loos.
Imediatamente, lezadu AdA nia kuinadu, bainhira haree akontesimentu sira, halo intervensaun no hakalma situasaun.
Nuudar konsekuensia direta no nesesaria husi asaun sira neebe deskreve, AdA sofre moras iha nia liman loos.
Moras sira neebe temi ona halo nia moras semana ida, lao labele servisu iha periodu hanesan.
Deliberada arguidu FA atua ho livre, deliberadamente no ho konsiensia, ho objetivu espesifiku atu prejudika isin no saude AdA nian, hatene katak soe soke iha kapasidade atu hamosu moras hanesan nee.
FA hatene katak nia hahalok nee lei bandu no bele hetan kastigu kriminal.
Tanba nee haree ba buat sira iha leten, no konsidera hahalok neebe deskreve, arguidu FA komete, hanesan autor (artigu 30, 1 Kodigu Penal), iha forma kompleta Krime ida kona-ba Ofensas Integridade Fizika simples neebe prevee no hetan kastigu hosi artigu 145.º, nu 1 husi Kodigu Penal.
Hatan ba akuzasaun nee arguidu FA deklara katak, faktus neebe mak Ministeriu Publiku duun ba arguidu nee balun loos no balun sala.
Arguidu deklara, iha momentu nee mosu diskusaun entre arguidu no lezadu kona ba ba buat neebe mak akontese iha lokal.
Arguidu dehan, kona ba tuku nee la loos, tanba arguidu dudu deit lezadu nia kabas, tanba arguidu nervozu.
Momentu akontesimentu ne, ema la iha arguidu ho lezadu deit mak iha neeba.
Nunee lezadu AdA deklara katak, iha dia 18 lezadu prepara atu ba misa, mak lezadu iha motor leten dalan nee taka, nunee arguidu hakat mai hodi dehan o provoka hau ga, no iha momentu diskusaun nee arguidu ho lezadu deit.
Lezadu dehan, arguidu tuku dala ida maibe lezadu la hasoru nia.
Nunee iha alegasaun Ministeriu Publiku husu Tribunal atu kondena arguidu durante loron 100 ho pena multa 50 no taxa diaria 0,50 centavos, karik Tribunal hanoin ida neebe mak kman liu bele aplika ba arguidu.
No parte Defeza konkorda alegasaun Ministeriu Publiku nia, nune husu Tribunal atu aplika pena multa no haree mos ba arguidu nia kondisaun ekonomiku.
Hafoin rona tiha parte sira nee, Tribunal deside muda ba loron seluk hodi rona desizaun ikus.
Iha audensia Julgamentu nee prezide hosi Juiz Estajiariu, Ministeriu Publiku reprezenta husi Prokurador Bartolomeo de Araujo no arguidu hetan asistensia legal husi Defensor Publiku estajiariu nain ida.
(ter)
