DILI, STLTIMORLESTE.com – Tribunál Judisiál Primeira Instánsia Dili (TJPID) kondena prizaun preventiva ba arguidu inisial MP, enkuantu arguidu inisial V hetan medida aprezentasaun periódika.
Tribunal Judisial Primeira Instánsia Dili, Segunda nee (31/08), deside aplika medida koasaun diferente ba arguidu na’in rua MP no V, ne’ebé akuzadu ho krime Furtu Agravadu no Danu Simples ne’ebè previstu iha artigu 252 no artigu 258 husi Kodigu Penal Timor Leste nian.
Juiz turnu Jose Gonsalves, depois de rona deklarasaun arguidu na’in rua iha prosesu primeiru interogatoriu, deside aplika prizaun preventiva ba MP.
Tribunal justifika desizaun ne’e ho razaun katak MP antes ne’e mai ona Tribunal tanba alegasaun krime hanesan.
Enkuantu ba arguidu V, Tribunal aplika medida apresentasaun periódika, ho obrigasaun atu aprezenta an regularmente iha eskuadra Polísia ne’ebé besik.
Ministériu Públiku, reprezenta husi Prokuradór turnu Aderito Tilman, antes husu Tribunal atu aplika prizaun preventiva ba arguidu na’in rua.
Maibé, parte defeza husu medida apresentasaun periódika ba arguidu na’in rua.
Arguidu na’in rua bele halo rekursu ba Tribunal Rekursu, liu husi defeza, se la aseita despaisu Tribunal nian, ho prazu loron 30.
Prosesu ne’e prezide husi Juiz Jose Gonsalves, enquanto Defensor turnu Germano Ramos Brite fó asisténsia legal ba arguidu na’in rua.
Kazu ne’e akontese iha madrugada Sexta-feira, iha Vila Likisa, no autoridade seguransa detein kedan arguidu na’in rua.
Arguidu sira alegadamente oho karau ida, koa no prepara atu tula ba kareta, maibé autoridade seguransa konsege detein sira.
(ter)
