DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime Ofensas Integridade Fizika Simples no krime Ameasa, neebe alegadamente komete husi oknum PNTL inisial JdJ hasoru lezadu N iha Bekora.
Iha autus sufisiente katak, iha loron 14 fulan Setembru tinan 2025, maizumenus tuku 5:30 loraik, iha area Kakakeu Laran Bekora, Dili, arguidu lori manu ba faan ba lezadu, maibe tanba la iha ema ida mak sosa, nia lori fali manu nee ba uma no faan ba vizinhu.
Bainhira lezadu koalia hela ho nia vizinhu, derrepente arguidu JdJ tiru lezadu dala rua iha nia tilu hun no lezadu hakfodak, no arguidu halai ba tuku kedas lezadu iha nia oin sorin karuk, tuir mai arguidu tuku iha lezadu nia tilun ho nia pistola hodi halo lezadu nia ulun kona didin lolon no rezulta kanek.
Rezultadu husi asaltu fiziku neebe arguidu komete halo lezadu hetan kanek iha ruin no tilun, maizumenus fulan ida mak foin rekopera. Vitima hetan tratamentu iha Klinika Bekora, Dili.
Iha momentu neeba arguidu ameasa lezadu ho kilat, hodi hateten, “Hei, o naok teen, hau sei tiru mate o.” Hodi komete hahalok sira neebe deskreve neebe nia hatene katak lei bandu.
Arguidu JdJ atua ho livre, deliberadamente no ho konsiensia, la konsege hadook aan husi hahalok hanesan nee. Nia iha intensaun atu prejudika vitima nia integridade fiziku no saude, hodi hamosu moras no bubu, neebe mak akontese duni.
Arguidu atua ho voluntariu, livre no ho konsiensia, ho konsiensia tomak katak ninia hahalok nee bele hetan kastigu tuir lei. Hodi halo nunee, nia viola vitima nia liberdade movimentu, hodi husik vitima iha tauk tanba ameasa neeba.
Aleinde nee, nia hatene katak ninia hahalok nee bandu no bele hetan kastigu tuir lei nuudar krime. Bazeia ba buat sira neebe temi ona, arguidu JdJ komete nuudar autor material no forma konsumadu krime rua, krime Ofensas Integridade Fizika Simples no krime Ameasa.
Kazu nee rasik antes nee Tribunal rona ona arguidu no lezadu nia deklarasaun, tanba nee Tribunal kontinua rona depoimentu sasin nia.
Sasin G deklara katak, iha momentu neeba sasin faan hela sasan, arguidu lori manu ba faan ba sira, manu nee kesi iha dapur. Hafoin sasin ba foti osan rona pistola tarutu dala rua, no sasin sai mai haree pistola nee se ba tilun hun parte karuk lezadu nian, no arguidu sadere ba moru lolon no dehan ba lezadu o mangame hau tuku knosen, se pistola mak uluk, no konaba arguidu no lezadu nia problema nee sasin la hatene.
Sasin dehan, bainhira dudu ba parede hun haree lezadu nia tilun hun kanek.
Sasin esplika, iha tempu nee arguidu sira la hemu tua. No tempu nee sasin la rona liafuan mal ruma husi lezadu no rona deit mak pistola tarutu.
Rona tiha sasin, Tribunal husu ba iha Ministeriu Publiku no defeza atu tama ba iha faze alegasaun.
Iha alegasaun Ministeriu Publiku husu Tribunal atu aplika pena neebe mak razoavel ba arguidu.
No parte defeza husu Tribunal atu aplika pena multa tuir kondisaun arguidu nia no ba krime ameasa defeza husu Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Iha audensia Julgamentu nee prezide husi Juiz Singular, Fransisca Cabral, Ministeriu Publiku reprezenta husi Prokurador Aderito Tillman, no arguidu hetan asistensia legal husi Defensor Publiku estajiariu nain ida.
(jen)
