DILI, STLTIMORLESTE.com – Tribunal Judisial Primeira Instansia Dili (TJPID) iha Tersa (07/07/2026), halao julgamentu ba krime Violensia domestika konjugadu Ofensas Korporais Simples, neebe mak komete husi arguidu inisial CdSdJ nuudar aman hasoru lezada inisial LdSdJ nuudar oan.
Tuir akuzasaun katak, lezada LdSdJ ho arguidu CdSdJ, hanesan oan no aman hela hamutuk iha uma ida iha Aldeia 12 de Outubro, Suku Komoro, Postu Administrativu Dom Aleixo, Munisipiu Dili, no ekonomikamente lezada dependente ba arguidu.
Iha loron 12 fulan Novembru 2024, haleu tuku 21.00 OTL, lezada hetan baku husi arguidu ho basa dala rua atinji iha hasan parte karuk, tuir mai hodi fiu eletrisidade baku dala barak iha kotuk laran kauza moras no bubu.
Arguidu baku lezada ho razaun lezada atu sai ba foti nia sapatu iha kolega nia uma, komu kalan ona arguidu la autoriza, lezada la halo tuir nunee arguidu baku lezada.
Konsekuensia husi arguidu nia hahalok nee halo lezada hetan moras, bubu iha hasan no kotuk laran, maibe lezada la halo tratamentu iha Mediku.
Arguidu pratika aktus nee ho intensaun no konsiente, nia hatene lei proibe, maibe nia halo ho livre, neebe la obsta nia komportamentu, mesmu nia hatene hahalok baku nee halo ba nia oan feto neebe nia mak trata no fo han too boot.
Nunee konstitui arguidu CdSdJ nuudar autor material ba krime violensia domestika konjugado Ofensas korporais Simples tuir artigu 35 al A, lei numero 7/2010 de 7 de Julho, ho referensia iha artigu 145 Kodigu Penal.
Hatan ba akuzasaun nee, arguidu CdSdJ deklara ba Tribunal katak, faktus sira nee balun loos no balun sala, tanba iha momentu neeba arguidu lori fiu baku tanba lezada iha tuku 10:00 kalan mak atu sai, nunee arguidu bandu tanba ezame besik ona no lezada hasoru arguidu ho ibun boot, nunee arguidu baku lezada ho fiu dala lima ka dala neen.
Arguidu rekonhese baku nee tanba arguidu nervozu. No hafoin baku tiha sira diak malu fali.
Aleinde nee lezada LdSdJ deklara katak, baku nee iha kalan, tanba momentu neeba foti sapatu iha kolega nia uma. No moras nee la konsege ba hospital, tanba tiu sira hola ai-moruk hemu deit.
Hafoin rona tiha parte sira nee, Tribunal deside tama ba alegasaun Ministeriu Publiku no parte Defeza nia.
Nunee Ministeriu Publiku husu Tribunal atu aplika pena suspensaun, nunee iha futuru labele mosu tan problema seluk. No konaba objetu aprendidu hanesan fiu neebe mak arguidu uza baku lezada husu Tribunal atu afavor ba estadu.
No parte defeza husu Tribunal atu aplika pena multa ba arguidu.
Rona tiha parte sira nee, Tribunal deside muda ba loron Segunda tuku 9:00 dader hodi rona desizaun ikus.
Audensia Julgamentu nee prezide husi Juiz singular estajiariu nain ida, Ministeriu Publiku reprezenta husi Prokurador Domingos Bareto, no arguidu hetan asistensia legal husi Defensor Publiku João Carvalho.
(ter)
