BAUKAU, STLTIMORLESTE.com – Tristeza, aman no oan tara aan iha Suku Ahik, Postu Administrativu Lakluta, Munisipiu Vikeke.
Xefe Suku, Ahik Ercílio Soares aprezenta, insidente nee akontese iha loron Tersa-feira semana kotuk, iha neebe oan Joanito Soares idade 20 resin hakotu nia vida liu husi tara aan, iha neebe aman Acácio Soares idade liu 50 akompanha familia hatun oan nia isin husi aihun neebe tara aan ba hodi ba uma no nia Aman Acácio Soares hakotu nia vida liu husi tara aan iha loron Kuarta-feira semana kotuk.
“Nia oan tara aan iha ailaran, nia aman nee mai tanis dehan apa tuir ona o neebe nia aman tara aan iha tuku 05:00 dadersan,” Xefe Suku Ahik Ercílio Soares informa ba STL liu husi telefone, Tersa (05/05/2026).
Nia sublina, husi insidente matebian Joanito Soares parte polisia no pesoal saude sira too kedas fatin, maibe la submete ba prosesu autopsia, tanba kondisaun mate isin grave.
Nunee mos matebian Acácio Soares nia mate isin la submete ba prosesu autopsia no kontinua kedas ba prosesu funebre.
“Matebian nain rua nee hakoi dala ida deit iha Sabadu nee,” Ercílio Soares.
Liga asuntu nee STL mos tenta konfirma Komadante Komando Polisia Munisipiu Vikeke, liu husi telefone, maibe la atende.
Entretantu matebian Joanito Soares no Aman Acácio Soares mate husik hela feen kaben no oan nain 4.
(tom)
