DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial EC hanesan laen neebe purada nia feen (lezada) ho inisial BCS too kanek, tanba deskonfia BCS amante ho mane seluk (selingkuh).
Tuir akuzasaun neebe Juiz prosesu Jose Gonsalves lee sai iha loron Kinta (15/01/2025) katak, iha loron 08 fulan Fevereiru tinan 2023, iha Suku ida iha Dili laran, arguidu tuku dala ida kona iha ofendida nia ulun, no tuku tan dala rua kona iha ofendida nia sorin loos.
Konsekuensia direita husi arguidu nia hahalok ofendida hetan kanek nakles no raan sai barak iha ulun sorin karuk, bubu iha ulun sorin loos, halo oin halai no ofendida monu ba rai.
Ofendida la ba halo tratamentu iha hospital kauza husi problema nee, tanba arguidu deskonfia Xefe Suku no lezada neebe koalia hela asuntu PNDS nian iha uma laran.
Arguidu halo ho forma livre, deliberada no konsientemente hatene katak, aktu neebe arguidu halo nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee proebidu no punidu tuir lei penal. Tanba nee, Ministeriu Publiku akuza arguidu komete krime Violensia Domestika ho Forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun neebe iha, arguidu deklara katak, faktus neebe iha balu los no balu lalos. Arguidu rekonhese momentu neeba arguidu tuku duni lezada dala rua, maibe lezada la monu ba rai, no motivu husi arguidu nia agresaun nee, tanba haree lezada koalia hela ho autoridade lokal ida.
Ho ida nee mak halo arguidu hirus, hodi halo agresaun ba lezada.
Arguidu deklara, akontese tiha problema, liu tiha fulan ida sira familia bolu malu tur hamutuk rezolve tiha, no agora la iha ona problema.
Arguidu deklara, antes nee deskonfia ona lezada ho nia amante, maibe arguidu buka tuir no ikus mai haree sira nain rua koalia mesak, arguidu foin halo asaun ba lezada.
Iha sala julgamentu laran lezada haforsa tan akuzasaun neebe iha katak, arguidu halo duni agresaun hasoru lezada, maibe sira rezolve ona tuir kultura.
Lezada deklara, momentu akontese problema lezada tauk hodi ba hela tiha ho lezada nia familia, maibe rezolve tiha problema lezada kontinua hela iha sira nia uma hamutuk ho arguidu, no husi neeba too mai agora la iha tan problema ona.
Rona tiha deklarasaun sira nee, iha alegasaun Prokurador Napoliao da Silva mantein ho akuzasaun nebee iha, husu Tribunal atu kondena arguidu ho pena multa US$ 60.
Enkuantu husi Parte defeza Jose Da Silva husu Tribunal tetu sirkunstansia hotu atu aplika pena neebe justu ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular, Jose Gonsalves, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Jose da Silva.
(eme)