DILI, STLTIMORLESTE.com – Visi Prezidente Partidu Libertasaun Popular (PLP) ba Asuntu Orgaun Assosiadu no Movimentu Nasional, Amílcar Araújo dos Reis Hatenu husu atu respeita no labele hirus no odiu ba programa kada partidu nian, tanba kada partidu idak-idak mai ho nia programa rasik.
Kestaun ne’e hato’o husi Amílcar ba STL iha Dili, Tersa (02/09/2026), relasiona ho diferensa programa entre partidu politiku sira iha Timor-Leste.
“Labele hirus no odiu, kada partidu idak-idak mai ho nia programa. Partidu seluk nian subsidiu fo ba povu, partidu seluk nian hakarak fo ba kompanhia. Ne’e susesu kada partidu idak-idak nia programa,” dehan Amílcar.
Visi Prezidente PLP ne’e hatutan, fo subsidiu boot ba kompanhia mos la sala, tanba ne’e parte ida husi politika dezenvolvimentu ekonomia nian.
“Fo subsidiu boot ba kompanhia mos la sala. Importante mak oinsa subsidiu ne’e bele fo benefisiu ba povu no ba dezenvolvimentu nasional,” Amílcar esplika.
Tuir Amílcar, povu mak sei tetu no hili programa ne’ebé diak liu ba sira nia moris.
“Tan ne’e labele halo odiu malu. Husu ba militante no apoiante sira hotu atu respeita malu, malu troka ideia, tanba demokrasia fo dalan ba partidu hotu atu aprezenta nia ideia,” nia hatete.
Iha parte ketak, Observador Politika, Jose da Silva hatete, diferensa programa entre partidu sira ne’e hatudu maturidade demokrasia iha Timor-Leste.
“Diak tebes bainhira partidu ida-idak iha programa ne’ebé klaru. Iha ne’ebé fo subsidiu ba povu no iha ne’ebé fo ba kompanhia, ne’e hotu hanoin diak ba nasaun. Importante mak implementasaun labele haluha povu nia interese,” dehan Jose.
Alende ne’e, Akademista UNTL Martinho Soares Alves hatete, politika subsidiu tantu ba povu no ba kompanhia presiza estudu kle’an atu labele fo impaktu ba orsamentu estadu.
“Subsidiu ba povu no subsidiu ba kompanhia iha vantajen no desvantajen. Maibe governu tenke iha balansu, labele fakar osan deit maibe tenke garante sustentabilidade ekonomia no justisa sosial ba povu hotu,” dehan Martinho.
(car)
