DILI, STLTIMORLESTE.com – Nuudar sidadaun no Timor oan apresia no orgulhu ho susesu husi delegasaun Foinsae Timor Leste (TL) iha kompetisaun ASEAN Student Leadership Conference, iha Singapura 2026.
Graduadu husi Uiversidade Nasional Timor Leste (UNTL), Genoneva Carvalho hatete, nuudar sidadaun no Timor oan apresia no kontente ho susesu husi delegasaun foinsae estudante TL iha kompetisaun ASEAN nian neebe halao iha Singapura, ho rezultadu neebe lori kontente ba povu no ba rai doben ida nee.
Nia afirma, ho rezultadu neebe sira lori hatudu duni kapasidade inteletual no lideransa foinsae TL nian, hodi bele konkore ho estudante sira husi nasaun ASEAN seluk iha kompetisaun nee.
“Nuudar sidadaun no joven TL, hau kontente ho alin sira nia susesu hodi hetan rezultadu diak iha kompetisaun internasional nee. Sira nuudar delegasaun husi TL nian, neebe konfiansa tomak fo ba sira hodi lori no hamorin nasaun TL nia naran iha kompetisaun ASEAN,” dehan nia ba STL iha edifisiu MESSK, Colmera, Tersa (04/08/2026).
Nia hatutan, ho prestasaun nee prova katak foinsae sira iha duni kapasidade atu halo inovasaun. Husu ba governu atu apoiu nafatin sira hodi partisipa iha kompetisaun internasional sira.
Nunee mos Edukador Carolina dos Reis hatete, apresia tebes ho susesu husi delegasaun estudante no foinsae Timor oan sira neebe tuir kompetisaun ASEAN iha Singapura. Nee hanesan orgulhu boot mai Timor oan sira hotu, hodi fo apresiasaun ba foinsae sira nia esforsu tomak.
“Hanesan Timor oan, ita orgulhu ho sira nia esforsu tomak. Tanba ho rezultadu neebe mak sira hetan, lori no hamorin liu tan TL nia naran iha nsaun sira seluk neebe hola parte iha kompetisaun nee. Ho susesu neebe sira hetan, nuudar sidadaun TL, ita nafatin suporta malu liu husi orasaun sira, atu Nai Maromak haraik nafatin isin diak no grasa matenek nian ba sira no foinsae sira seluk atu kontinua lori TL nia naran ba oin, tanba sira mak futuru nasaun nian,” dehan nia.
Nia hatutan, husu ba governu liu-liu ministeriu relevante atu nafatin fo oportunidade ba estudante sira hodi tuir nafatin kompetisaun importante sira hanesan nee.
Entretantu relasiona ho susesu delegasaun estudante TL konsege halo prestasaun notavel iha ASEAN Student Leadership Conference (ASLC) 2026, neebe realiza iha Singapura, ho rezultadu medalha ouro lima, medalha prata lima no atribuisaun The Youth Ambassadors Award ba estudante lima.
Iha dia 3 Agostu 2026, Governu liu husi Sekretariu Estadu ba Ensinu Sekundariu Jeral no Ensinu Tekniku-Vokasional (ESG-ESTV), Domingos Lopes Lemos anunsia ofisialmente iha konferensia imprensa iha sala konferensia Ministeriu Edukasaun, Vila Verde.
Iha intervensaun, Sekretariu Estadu hatete, rezultadu nee hatudu kapasidade inteletual, kriatividade no lideransa foinsae TL nian, neebe bele konkorre ho estudante sira husi nasaun ASEAN seluk iha kompetisaun internasional.
“Prestasaun ida nee prova katak foinsae TL iha kapasidade atu halo inovasaun no buka solusaun ba problema real sira bazeia ba koñesimentu sientífiku. Sira hatudu katak TL la menus husi nasaun seluk iha rejiaun,” dehan nia.
Delegasaun TL hetan apoiu husi família, dirijente eskola sira, Kongregasaun Salezianu Timor Leste, Banco Nacional de Comércio de Timor Leste (BNCTL) no Komisaun Nasional Timor Leste ba UNESCO (KNTLU) liu husi Ministeriu Edukasaun.
(dom)
