DILI, STLTIMORLESTE.com – Servisu Edukasaun Munisipiu Bobonaro aprezenta ona eskola tolu nolu resin hitu (37) ba Diresaun Nasional Rekursu Umanu iha Ministeriu Edukasaun (ME), tanba eskola 37 nee too agora laiha guarda eskola.
Diretor Servisu Edukasaun Munisípiu Bobonaro, Miguel Freitas ba STL liu husi telefone, Sesta nee (03/07/2026) hatete, kuaze eskola barak iha Munisipiu Bobonaro seidauk iha guarda no eskola balun deit mak iha, maioria nee laiha guarda, ho preokupasaun ida nee sira hatoo ona ba ME liu husi Rekursu Umanu para bele haree asuntu ida nee.
“Kona-ba guarda eskola ninia, nee hau aprezenta ona ba parte Rekursu Umanu ME nian, iha eskola 37 neebe mak hau aprezenta nee ba iha primeiru etapa nian, ba segundu etapa nian mak agora hau lista hela. Hau sei konfirma fali iha baze, ho nunee hirak neebe mak seidauk nee hau halo fali lista, atu nunee hau bele aprezenta ba segundu faze ninia, nee hau tau eskola nia naran no presiza hira, nee hau tau kedas iha nee ba,” nia haktuir.
Miguel dehan, daudaun nee maioria eskola barak laiha guarda, maibe ida nee kompetensia ME nasional nian hodi haree, tanba Diretor Edukasaun Munisípiu nee hatoo deit informasaun ba iha nasional, tanba kompetensia ba asuntu ida nee husi nasional ninia.
“Liu husi ami nian identifikasaun mak ami identifika ita nian eskola neebe ninia numeru ohin temi ona, nee laiha guarda, nee nivel eskolaridade, hahu husi pre eskolar, ensinu baziku, sekundariu jeral no tekniku vokasional,” katak nia.
(jac)
