BAUCAU, STLTIMORLESTE.com – Asidente tráfegu ne’ebé envolve kareta Grand Max kor mutin ho matríkula C.13.726 iha Kampu Baru, Postu Administrativu Vemasse, Munisípiu Baucau, rezulta vítima na’in ida mate no na’in rua kanek grave.
Xefe Departamentu Emerjénsia Ambulatóriu iha Sala Intensive Care Unit (ICU) Hospital Rejionál Eduardo Ximenes (HoREX) Baucau, Médiku Jerál Bazilia dos Santos Freitas, hatete katak HoREX simu vítima na’in haat husi asidente refere.
Husi vítima na’in haat, na’in rua hetan kanek grave, vítima ida lakon vida no vítima ida seluk hetan kanek raspa, maibé nia kondisaun jeral di’ak no hetan alta atu fila ba uma.
“Asidente foin loraik too iha emerjénsia totál na’in haat. Ida mak mate mai mós labele salva, tanba nia pankada maka’as iha nia ulun, ran fakar sai barak. Na’in rua mak kondisaun grave oituan, ida fali di’ak atu fila ba uma,” hatete Bazilia dos Santos Freitas ba jornalista sira iha Sala Emerjénsia HoREX Baucau, Segunda (31/08/2026).
Vítima sira identifikadu mak hanesan Jenito Anuku de Araújo Marques, idade 21, ne’ebé hetan pankada iha parte kanuruk. Ekipa médica fó ona atendimentu, inklui uza collar neck atu proteje kakorok. Vítima daruak, Bendito Soares, idade 18, hetan pankada iha parte kanotak no ekipa médica halo ona ezame X-Ray atu haree nivel kanek ne’ebé nia hetan.
Adolfo Martins, idade 36, hetan kanek raspa iha parte rentos. Hafoin hetan atendimentu médiku konsidera kondisaun jerál di’ak no hetan ona alta fila ba uma, enkuantu vítima ida seluk, ne’ebé hakotu iis, identidade la rejistu iha Sala Emerjénsia HoREX Baucau, maibé kontinua transfere ba sala mortuáriu antes transporta ba nia rezidénsia iha Munisípiu Viqueque.
Ba vítima na’in rua, hanesan Jenito Anuku de Araújo Marques no Bendito Soares, dadaun ne’e sei kontinua hetan observasaun iha Sala Emerjénsia HoREX Baucau no hein rezultadu X-Ray.
“Agora sei observa hela hein rezultadu X-Ray. Espesialista sira sei mai valora no fó desizaun se presiza baixa ka transfere ba Dili atu halo CT Scan, tanba ita haree kondisaun grave,” hatete Bazilia.
Kronolojia Asidente
Informasaun prelimináriu hatete katak vítima na’in haat ne’e iha karreta Grand Max ne’ebé refere husi Bicarin, Munisípiu Viqueque, ho destinasaun ba Dili.
Maibé, bainhira to’o iha área Kampu Baru, Postu Administrativu Vemasse, Munisípiu Baucau, karreta ne’e hetan asidente tráfegu tanba halai sai husi estrada.
Kondisaun no kauza exata husi asidente seidauk konfirmadu. Maibé, informasaun prelimináriu deskonfia katak motorista karreta refere dukur, ne’ebé bele sai faktór husi asidente.
Autoridade kompetente sei halo investigasaun atu determina kauza loos husi asidente refere.
(tom)
