BAUCAU, STLTIMORLESTE.com – Asidente trafiku iha estrada diresaun Baucau-Dili iha area Caravela, Postu Administrativu Vemasse, Munisipiu Baucau, rezulta nain ida mate fatin no ida kanek grave.
Asidente nee akontese iha loron 02 Julhu 2026, parte dader, involve entre motor Honda Beat sapa matrikula Y-5638 TL kondus husi Castro tula pasajeiru Carlos diresaun husi Dili atu ba Munisipiu Viqueque, iha neebe too iha estrada publiku area Caravela Postu Vemasse soke malu ho kareta truk sapa matrikula 58.109 TL, rezulta motorista husi motor Castro mate fatin, enkuantu pasaseiru Carlos hetan kanek grave.
Hafoin akontese asidente nee vitima asidente Carlos transporta kedas husi fatin asidente ba Hospital Rejional Eduardo Ximenes (HoREX) Baucau, halao tratamentu iha sala emerjensia no matebian Castro transporta husi fatin asidente ho kareta funerariu atual iha ona sala mortuariu HoREX Baucau, daudaun hein familia husi Uaimori Viqueque.
Relasiona asidente nee Komando Polisia Munisipiu Baucau liu husi Seksaun Tranzitu too ona fatin rekolha dadus no informasaun ba asidente refere.
(tom)
