BAUCAU, STLTIMORLESTE.com – Asidente tráfiku akontese iha área Vemasse Kampu Baru, Postu Administrativu Vemasse, Munisípiu Baucau, Segunda loraik (31/08/2026), rezulta ema na’in ida mate iha fatin no balu kanek.
Tuir informasaun prelimináriu husi terrenu ne’ebé hetan husi STL, asidente ne’e envolve kareta Grand Max kor mutin ho númeru matríkula C.13.726, ne’ebé tuir informasaun diresaun husi Munisípiu Viqueque atu ba Dili.
Kareta ne’e, tuir informasaun prelimináriu, lori ema na’in tolu (3) inklui kondutor. Bainhira to’o iha área Vemasse Kampu Baru, kareta ne’e hetan asidente ne’ebé ikus mai rezulta ema na’in ida mate iha fatin, enkuantu pasajeiru sira seluk hetan kanek.
Komunidade lokal iha terrenu fó apoiu ba vítima sira no halo kontaktu ho ekipa ambulánsia hodi transporta vítima sira ba Hospital Rejionál Eduardo Ximenes (HoREX) Baucau hodi hetan tratamentu médiku.
Até agora, kauza exata husi asidente seidauk konfirmadu. Parte Polísia Tráfiku sei hala’o investigasaun iha terrenu hodi determina motivu no kronolojia loos husi akontesimentu.
(tom)
