DILI, STLTIMORLESTE.com – Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural Habitasaun Komunitaria, Mariano Assanami Sabino husu ba estudante no sosiedade atu respeita profesores iha fatin neebe deit.
“Saude ho edukasaun nee fundamentu ba oin ita tama iha ASEAN, tama ba membru CPLP, organizasaun oin-oin mak ita hola parte, nee presiza ema matenek para atu kompete, komersiu mundial ita tama ita loke ita nian merkadu ba ema liur, no ita mos tama merkadu ema liur nian, maibe nee presiza ema matenek, agora se mak halo ema matenek, inan aman ho profesores sira, liu-liu inan sira, tanba sira mak edukador primeiru, maibe segundu profesor sira, tanba nee husu para hahu fali iha ita nian ukun aan nee, ita hahu hatene respeitu fila-fali, tau mestre nuudar edukador nudar responsabilidade ba etika moral,” afirma Assanami ba jornalista sira iha salaun Ian Martin, Balide, Segunda nee (17/02/2025).
Visi PM nee dehan, iha atividades saida deit, atividades estadu, governu no atividades saida deit tenke respeitu profesores no mediku, tanba ida halo ema sai matenek, no ida seluk halo ema moris naruk, asuntu rua nee importante.
“Hau rona iha fatin balu ema hirus profesor sira no kontra profesores, hau husu ba sira ita hotu-hotu mai ita hamutuk respeitu sira nee iha ita nian karakter nuudar Timoroan ida, tenke respeitu se mak halo ema matenek, nee mak profesor, maske sira ho salariu neebe kiik. Neebe dala ida tan ba profesor sira mak autoridade nakonu ho responsabilidade moral no husu ba estudantes no sosiedade proteja sira iha neebe deit no respeitu sira,” katak nia.
Nunee mos Ministra Edukasaun (ME), Dulce de Jesus Soares hatete, profesor mak forma ema sai matenek, tanba sira mak prepara estudantes sira no liu husi sira nian kontribuisaun, sira didikan aan hanorin estudante sira.
(jac)
