DILI, STLTIMORLESTE.com – Atendimentu servisu saude sira iha Postu Saude Tasi-Tolu diak no lais, maske fasilidade saude la kompletu no fatin neebe klot, maibe pesoal saude sira nian atendimentu ba pasiente sira diak.
Tuir sidadaun no pasiente João da Silva neebe mai konsulta iha Postu Saude Tasi-Tolu hatete, mai konsulta iha Postu Saude ida nee tanba senti moras iha ulun no matan durante loron 3 nia laran ona. Iha uma deit senti la diak no moras hela deit, entaun hakat tiha mai hodi konsulta.
Nia katak, saude nee importante tebes ba ema nia moris, tanba bainhira saude diak mak bele halo buat hotu mais bainhira saude la diak labele halo servisu ho livre, tanba kondisaun saude mak ladiak.
Nunee bainhira moras labele nonok iha uma, maibe koko hodi hakbesik aan ba postu no sentru saude sira hodi halo tratamentu.
“Hau hela iha Maslidun, Danau nian, tanba senti moras iha isin lolon mak hau mai konsulta iha Postu Saude nee. Atendimentu pesoal saude sira iha Postu nee diak no lalais. Tau naran konsulta iha tuku 08:00, depois nee sei koko tensaun mak foin konsulta ho mediku,” dehan nia ba STL iha Tasitolu, Dili. Tersa (28/04/2026).
Nia katak, Postu Saude nee klot hela, fatin ba pasiente sira hodi tur hein la too no klot, entaun tenke sai mai hein iha liur. Maibe ida nee la sai preokupasaun ba komunidade, importante mak pesoal saude sira nia atendimentu diak no lalais, nee mak ema hotu hakarak.
Nunee mos Merita Pereira katak, bainhira senti moras ruma iha isin lolon sempre mai halo konsulta iha Postu nee, tanba hela iha Danau nian entaun lao deit mai iha nee mak besik.
Tuir nia, atendimentu pesoal saude sira iha Postu nee diak, no lalais deit fila uma ona. Aimoruk sira neebe simu iha nee, bainhira hemu iha uma sempre pasa. Nee mak bainhira familia ruma moras, sempre mai konsulta iha nee.
Entretantu tuir pesoal saude neebe lakohi temi naran hatete, pasiente neebe mai konsulta iha Postu Saude nee husi parte Tasitolu nian deit, maibe komunidade balun ba halo konsulta iha Sentru Saude Komoro.
(dom)
