DILI, STLTIMORLESTE.com – Eskola neebe menus sala de aula, ba oin presiza aumenta sala aprendizajen ba estudante sira.
Patricio da Costa Magno, hanesan Diretor Servisu Edukasaun Munisipiu Ainaro hatoo kestaun nee ba STL, Domingu nee (19/01/2025).
Kona-ba infraestrutura eskola too agora eskola balu lao seidauk diak, tanba eskola balu nee halo dezde iha tempu Indonezia ninia, maibe ukun aan nee estadu rezolve balu ona, agora mos koko eskola neebe sala menus atu aumenta tan sala, nee ba primeiru no segundu siklu, neebe eskola maioria nee iha tempu Indonezia ninia, balu estadu rezolve ona no balu seidauk rezolve,” dehan nia.
Nia hatutan, ba eskola neebe kondisaun seidauk diak, nee koko atu tau iha planu, para tinan ida bele rezolve oituan-oituan, atu nunee iha governu nee bele haree asuntu ida nee, tanba sala de aula nee importante.
“Atu nunee ita nia oan sira uza hodi eskola ho ativu, kona-ba kadeira no meza, ita koko hela, eskola neebe mak liu ita bele foti taka ba iha eskola balu neebe sei menus, ita halo nafatin pedidu mai iha Ministeriu Edukasaun koko atu rezolve oituan,” tenik nia.
Nunee mos Diretor Diresaun Nasional Infraestrutura no Edukativu iha ME, Helio Lopes hatete, tanba nee halo prioridade hirak nee fazeadamente, moru talves ba tinan sira tuir mai, no agora konsentra ba fasilidade importante sira hanesan sala aula, haris fatin, instalasaun bee moos, sala profesor, iha kondisaun neebe minimu molok hakat ba konstrusaun moru.
“Moru protesaun ME sei konsidera iha tinan orsamentu tuir mai, tanba eskola barak presiza moru, maibe ita nia orsamentu ita konsentra ba fasilidade sala de aula, sala profesor nia, ita fo instalasaun bee moos ba eskola sira. Ita prioritiza hirak nee, hafoin ita halo konstrusaun ba moru iha eskola sira neebe la iha. Ita labele halo uluk konstrusaun ba moru, maibe iha kazu balu neebe eskola balu presiza tebes sala de aula, entaun ita responde lai sala de aula sira nee para estudante sira iha kondisaun ida neebe diak hodi partisipa iha ensinu aprendizajen,” dehan Helio.
(jac)