DILI, STLTIMORLESTE.com – Australia valoriza tebes parseria ho Timor Leste (TL) iha mobilidade laboral sai hanesan ezemplu diak, no pratika husi parseria iha asaun, no daudaun nee Timor oan liu rihun 25 mak servisu iha Australia.
Embaixador Australia ba Timor Leste, Edward Milkinson ba jornalista sira iha Hotel Palm, Kuarta (08/07/2026) hatete, Australia valoriza tebes parseria ho Timor Leste, mobilidade laboral sai hanesan ezemplu diak liu no pratika husi parseria iha asaun.
“Dezde 2012, mobilizasaun trabalhador sira ba Australia liu ona rihun 25 mak halo ona viajen ba Australia liu husi programa mobilidade laboral. Sira nia dedikasaun, profisionalizmu no etika servisu neebe forte, hetan ona reputasaun neebe diak los no ajuda kria oportunidade ba trabalhador Timoroan rihun ba rihun tan atu tuir,” dehan Reprezentante Embaixadora Australia iha TL.
Edward Milkinson dehan, Australia sente orgulhu atu servisu hamutuk ho SEFOPE hodi kontinua haburas oportunidade hirak nee. Hamutuk, fahe ambisaun ida atu habelar partisipasaun, loke dalan foun, no garante traballador sira fila ba uma ho abilidade, esperiensia no oportunidade foun neebe fo benefisiu ba sira-nia familia, komunidade no Timor Leste nia dezenvolvimentu iha futuru.
Nia dehan, Australia no Timor Leste iha ambisaun hamutuk atu kria liutan oportunidade sira-nee hodi apoia partisipasaun traballador neebe boot liutan, loke dalan ba nivel abilidade foun, no kria oportunidade foun ba traballador sira bainhira sira fila ba uma.
“Trabalhador sira neebe ohin iha nee sei ba hela no serbisu iha Queensland, South Australia, Tasmania, New South Wales, Victoria no Western Australia. Ita-boot sei fo kontribuisaun importante ba industria no komunidade sira iha Australia. Iha tempu hanesan ita boot sira hametin ligasaun entre ema-ba-ema neebe maka nuudar pontu prinsipal iha ita-nia relasaun bilateral,” katak nia.
Nia hatutan, Australia iha nafatin kompromisu atu servisu iha parseria besik ho Governu Timor-Leste hodi apoia moris diak ba traballador Timoroan sira neebe partisipa iha eskema PALM. Hamutuk ho SEFOPE no parseiru sira seluk, Australia sei kontinua promove esperiensia neebe seguru, pozitivu no valores diak neebe ajuda traballador sira harii sira nia abilidade, apoia sira-nia familia no kontribui ba Timor-Leste nia dezenvolvimentu ba tempu naruk.
“Hau hakarak hatoo hau nia agradesimentu ba Ita-boot sira, tanba sei fo kontribuisaun boot ba Australia. Liu husi ita boot sira-nia servisu makaas, ita-boot sira sei fo apoiu ba industria no komunidade sira iha Australia, enkuantu hametin mos ligasaun ema-ba-ema. Iha inisiu tinan nee, Primeiru-Ministru Albanese no Sua Eselensia Primeriu Ministru Gusmão lansa ona Parseria Foun ba Era Foun no reafirma importansia mobilidade traballador nian nuudar pillar ida iha relasaun entre Australia-Timor-Leste,” katak nia.
Nia mos hakarak rekonese no agradese ba SEFOPE nia lideransa no kolaborasaun. Liu liu rekonese Sus clansia Sekretariu Estadu Mendonça ba serbisu makaas be tempu naruk. Susesu ba mobilidade traballador reflete forsa parseria entre nasaun rua neebe harii iha konfiansa mutua, ambisaun hamutuk no kompromisu atu kria oportunidade ba ema Timor-oan sira.hein atu kontinua kolaborasaun besik ida nee iha tinan sira tuirmai.
(eme)
