BAUCAU, STLTIMORLESTE.com – Autoridade Munisipiu Baucau apoiu kombustivel produtu Gazoel hamutuk litru 474 ba normaliza estrada diresaun husi Baguia Vila too Suku Afaloicai, Postu Administrativu Baguia, Munisipiu Baucau.
Administrador Postu Administrativu Baguia, Mario Xavier da Silva aprezenta, durante udan boot neebe akontese iha loron 13 Maiu 2026 rezulta estrada diresaun husu Baguai Vila ba Suku Suku Ossohuna no Afaloicai kotu total iha area Basarauai Suku Hae-Coni, iha neebe durante nee impaktu movimentasaun transporte publiku no privadu. Tanba nee Autoridade Postu diriji karta ba Autoridade Munisipal Baucau no hetan resposta kombustivel produto Gazoel atu normaliza hikas estrada refere.
“Kombustivel neebe ita hetan nia litru mak ita la hatene, mais ita husu iha bidon tolu neebe mak fornese husi Autoridade atu lori ba karik la too komunidade sira sei aumenta,” hateten Mario Xavier da Silva ba STL hafoin simu kombustivel husi Autoridade Munisipal iha Vila Nova Baucau, Kuarta (08/07/2026).
Nia kalkula, produtu kombustivel neebe Autoridade Munisipal apoiu, Autoridade Postu Baguia sei oferese ba kompanhia Rivio Constraction nuudar Baguia oan neebe ho inisiativa voluntaria kontribui atu normaliza hikas estrada refere.
Maibe kombustivel neebe parte Autoridade Munisipal apoiu iha seidauk sufisiente atu responde, tanba normalizasaun estrada refere sei hahu husi area Baguia too Suku Afaloicai ho total kilometru 10 resin.
Nia komenta, bainhira utiliza kombustivel refere iha prosesu normalizasaun estrada mak la responde ona, parte komunidade sira sei fo kontribuisaun nunee normalizasaun estrada refere bele finaliza fo asesu hikas ba transporte publiku no privadu diresaun Baguia Vila ba Ossohuna no Afaloicai.
“Ho normalizasaun estrada ida nee ita bele garante ona transporte publiku no privadu bele lao normal fali ona iha Suku rua Ossohuna no Afaloicai,” Mario akresenta.
Autoridade masimu Postu Administrativu Baguia nee deklara, durante estrada kotu iha area Basarauai, Suku Hae-Coni, Postu Baguia, komunidade sira husi Suku Ossohuna no Afaloicai infrenta problema mak hanesan, hulan pasiente husi Suku Ossohuna ba Sentru Saude Baguia, folin produtu importadu hanesan foos kilograma 25 kada saka atinji liu US$ 20, komunidade sira labele lori sai produtu lokal ba asesu merkadu inklui mos iha tempu udan labarik estudante sira husi Hae-Coni labele asesu ensinu aprendizajen iha eskola Ensinu Bazika Ossohuna.
(tom)
