BAUKAU, STLTIMORLESTE.com – Autoridade Munisipiu Baukau liu husi ekipa konjunta solusiona problema fatuk ba projetu reabilitasaun estada diresaun Loilubu-Fatumaka ba Postu Administrativu Venilale, neebe durante komunidade balu la koopera, tanba la hetan benefisiu husi fatuk neebe kompanhia atu utiliza.
Xefe ekipa konjunta atual Sekretariu Munisipal Planeamentu Investimentu no Dezenvolvimentu, Eduardo Filipe Ximenes esplika, relasiona ho prosesamentu fatuk ba projetu reabilita estrada diresaun Fatumaka-Loilubu iha Aldeia Oralan, Suku Vemasi, Postu Administrativu Vemasi neebe durante nee nain ba rai sira trava kompanhia halao servisu, tanba iha dezentendimentu mak iha loron 09 Junhu nee, ekipa konjunta husi Autoridade Munisipiu Baukau realiza dialogu ho nain ba rai no parte kompanhia iha ona solusaun hodi kompanhia hahu prosesamentu ba fatuk hodi apoiu projetu reabilitasaun estrada diresaun Fatumaka-Loilubu no Venilale.
“Dialogu hamutuk ho empreza no rai nain sira foti ona solusaun ba problema nee, tanba problema nee dezde empreza asina tiha kontratu ho Governu servisu nee para kuaze fulan lima, maibe ita foti ona solusaun katak parte rua iha ona akordu atu asegura servisu nee ba oin,” hateten Eduardo iha Vila Nova Baukau, Kuarta (11/06/2025).
Kmpanhia neebe asina kontratu ho Governu halo prosesamentu fatuk iha Oralan mak Domin Timor Diak Lda neebe tuir lo-loos prosesamentu fatuk hahu ona iha fulan Janeiru tinan nee, maibe mosu dezentendimentu nunee kompanhia la halao servisu hodi apoiu prosesamentu fatuk ba projetu reabilita estrada diresaun Fatumaka-Loilubu no Venilale.
Tanba nee Autoridade Munisipiu Baukau esforsu hodi solusiona no hamosu akordu entre nain ba rai ho kompanhia vale ba tinan 10 neebe testemunha husi Autoridade Postu Vemasi, Autoridade Seguransa inklui Autoridade Munisipiu Baukau hodi garante sei fo susesu ba projetu reabilita estrada diresaun Fatumaka-Loilubu no Venilale.
Reprezentante kompanhia Domin Timor Diak Lda, José Celestino hateten, prezensa kompanhia Domin Timor Diak tuir lo-loos halao ona servisu prosesamentu fatuk, tanba negosiasaun entre kompanhia ho nain ba rai iha ona konkordansia, maibe mosu dezentendimentu, tanba estatus rai la klaru, nunee servisu kuaze para fulan lima.
Maibe agradese ba esforsu Autoridade Munisipiu Baukau, tanba bele foti solusaun ba dezentendimentu refere hodi kompanhia bele hahu ona prosesamentu fatuk ba projetu reabilita estrada Loilubu-Fatumaka no Venilale.
“Ita halo atividade ida iha komunidade nia leet prezisa iha harmonia kooperasaun servisu diak, maibe ami agradese tanba ho solusaun nee ami bele alkansa ho akordu nee realiza servisu ho diak,” hateten José.
Komunidade nain ba rai, Lourenço da Costa Freitas hateten, dezentendimentu ba rai no fatuk neebe kompanhia Domin Timor Diak Lda atu utiliza durante nee mosu, tanba kauza husi problema balun hodi trava kompanhia halao servisu, maibe liu husi dialogu neebe lidera husi Autoridade Munisipiu Baukau iha ona solusaun no orienta kompanhia atu halao servisu.
“Ami iha ona konkordansia ho kompanhia ba tinan 10 fo osan rihun 30, maibe fo uluk rihun 25, rihun lima hela fo garansia ba kompanhia, ami aseita ona kada tinan kompanhia fo tempu haree foun batar foun fo US$ 250 halo tuir too tinan 10 nia laran,” katak Lourenço.
Nain ba rai nee informa, akordu kompensasaun osan rihun US$ 30 ba tinan 10 no kada tinan tempu sau batar no hare parte kompanhia sei apoiu US$ 250.00 hodi halo tuir serimonia ritual.
No akordu neebe iha parte nain ba rai sei kopi hodi arkiva iha Suku, Postu no too iha Munisipiu, nunee sai evidensia hodi la prejudika kompanhia halao servisu.
Entretantu kompanhia Domin Timor Diak Lda neebe selebra kontratu ho Governu ba tinan 10 halo prosesamentu fatuk, britas, rai henek no seluk tan hodi formese ba projetu sira neebe Governu liu husi kompanhia lokal implementa iha baze.
(tom)
