BAUKAU, STLTIMORLESTE.com – Autoridade Suku Loilubu triste ho atendimentu Diretor Servisu Munisipal Agrikultura Baukau neebe la atende pedidu fila rai husi Suku Loilubu, Postu Administrativu Vemasi.
Xefe Suku Loilubo, Joanico da Costa Freitas hateten, Suku Loilubu potensialidade ba produtu lokal, maibe atu hasae numeru produsaun hatan ba nesesidade merkadu susar, tanba inisiu tinan 2010 too 2025 seidauk hetan fasilidade apoiu traktor fila rai gratuitu ba komunidade agrikultores sira.
“Kada tinan proposta ba hela deit, maibe implementasaun traktor mai iha Suku nee mak husi 2010 ate agora nein fasilidade fila rai gratuita ba komunidade,” hateten Joanico ba STL iha Suku Loilubu, Postu Administrativu Vemasi, Kinta (05/06/2025).
Nia esperansa sentimentu triste ba pedidu inisiu tinan 2010 too tinan 2025 neebe kada tinan hatoo ba Servisu Munisipal Agrikultura Baukau laiha resposta, tanba traktor boot neebe Governu destaka iha kada Munisipiu inklui Munisipiu Baukau, objetivu atu hatan pedidu suku fila rai gratuita ba komunidade, maibe durante nee la akontese iha Suku Loilubu.
Nia sublina, durante tinan 10 resin komunidade Suku Loilubu la sente vantajen husi traktor hirak neebe destaka iha Edifisiu Servisu Munisipal Agrukultura Baukau, mak parte Autoridade Suku inisiu tinan nee foti inisiativa tenta hasoru direta Diretor Servisu Munisipal Agrukultura Baukau, maibe hatan traktor hirak neebe destaka iha Baukau maioria kondisaun aat no restu neebe kondisaun diak fila rai iha fatin seluk.
“Nee mak hau dehan, ami nee sidadaun Munisipiu Baukau ga lae, tanba saida ami nia proposta mai ita boot (Diretor Servisu Munisipal Agrukultura Baukau) labele maneja too ba ami, nee mak nia dehan depois mak haruka, maibe too agora laiha rezultadu sente hanesan halo diskriminasaun ba ami,” Joanico katak.
Xefe Suku nee fundamenta, komunidade Suku Loilubu 75% moris vida agrikultura, maibe tinan 10 resin ona pedidu fila rai gratuita neebe diriji ba Servisu Munisipal Agrukultura Baukau laiha rezultadu.
Nia haktuir no agradese, tinan naruk neebe komunidade balun iha Suku Loilubu hetan produsaun barak, tanba hetan apoiu fila rai husi tratorista kolejiu Fatumaka, maibe la responde hotu, tanba komunidade agrikultores barak.
Nunee obrigatoriu komunidade balun tenke utiliza sistema manual, maibe la responde ba nesesidade merkadu, tanba labele hetan rendimentu produsaun ho diak hodi sustenta ekonomia familia.
“Komunidade Loilubu barak mak vida agrikultura, entaun husu fasilita ami traktor fila rai para ajuda netik ita nia agrikultores sira hatutan sira nia moris haree oan sira nia eskola no nesesidade familia,” Joanico rekomenda.
Xefe Suku nee katak, mezmu Governu apoiu ona hand-traktor (kor kinur) ida ba Suku Loilubo, maibe daudaun la utiliza asegura deit iha armajen, tanba hand-traktor refere laiha forsa atu fila rai, tanba nee husu Servisu Munisipal Agrikultura Baukau atu responde pedidu fila rai husi Suku Loilubu neebe tinan 10 resin laiha resposta.
Too notisia nee publika parte STL seidauk hetan komentariu husi Diretor Servisu Munisipal Agrukultura Baukau, tanba laiha knaar fatin.
(tom)
