NITIBE, STLTIMORLESTE.com – Autoridade Suku Beneufe Preokupa ho linha telekomunikasaun husi Kompanhia Timor Telecom ho Telemor iha ninia area Suku rasik neebe fatin barak laiha linha.
Kestaun nee hatoo husi Xefe Suku Beneufe, Marcos Coel Meni Sila ba jornalista STL iha Aldeia Citrana, Suku Beneufe, Postu Administrativu Nitibe, Rejiaun Administrativu Espesial Oekusi-Ambeno (RAEOA) Sabadu (07/06/2025).
“Ami Nia preokupasaun iha Suku Beneufe mak nee, linha telekomunikasaun husi Timor Telecom ho Telemor iha area balun laiha, tanba nee bainhira komunidade hakarak halo komunikasaun kona problema sosial ruma tenke lao ba fatin balun neebe dook tebes hodi buka linha telekomunikasaun mak foin halo komunikasaun,” dehan Xefe Suku Beneufe, Marcos Coel Meni Sila.
Iha biban nee nia husu ba Kompanhia Timor Telecom ho Telemor atu harii sira nia tower ou antena iha Suku Beneufe, liu-liu iha area balun neebe laiha linha Naktuka, Oelafeno Faotbena no Aldeia Manan, linha telekomunikasaun sempre lakon mosu.
Nia dehan, foin lalais nee Prezidente Autoridade Rejiaun Administrativa Espesial Oekusi-Ambeno (RAEOA), Rogerio Tiago de Fatima Lobato bainhira halo dialogu ho komunidade Suku Beneufe iha Sede Suku, rona ona preokupasaun povu Suku Beneufe kona-ba linha telekomunikasaun, tanba nee solusaun provizoriu Governu Autoridade RAEOA sei fornese Starlink hodi instala iha Sede Suku nomos Postu Saude atu fasilita informasaun ba nivel rejional no nasional.
“Hau hanoin inisiativa husi Autoridade RAEOA atu instala linha telekomunikasaun Starlink nee diak ona maibe ida nee sei atende deit iha Sede Suku no Postu Saude deit, tanba nee rekomenda ba kompanhia rua nee atu harii sira nia tower iha Suku Beneufe,” dehan nia.
Antes notisia nee publika STL sedauk hetan konfirmasaun husi Kompanhia Timor Telecom ho Telemor ba problema linha telekomunikasaun iha suku Beneufe.
(jos)
