DILI, STLTIMORLESTE.com – Bankada Partidu FRETILIN ho Partidu Libertasaun Popular (PLP) iha Parlamentu Nasional hatoo sentidu kondolensia klean ba familia sira, liu-liu Roque Rodrigues neebe lakon ona nia espoza Paua Ferreira Pinto.
Deputada Bankada FRETILIN, Lídia Norberta dos Santos katak, nia parte simu notisia tristeza ida katak Roque Rodrigues nia espoza Paula Ferreira Pinto hakotu ona iis iha Hospital Nasional Guido Valadares (HNGV).
Tan nee, nia lori Bankada FRETILIN nia naran hatoo sentidu kondolensia klean ba Doutor Roque Rodrigues ho familia tomak neebe hasoru hela situasaun tristeza ida nee.
“Tanba nee hatoo ami nia sentidu kondolensia klean ba Doutor Roque Rodrigues no familia sira,” hatete nia liu husi plenaria Parlamentu Nasional, Segunda (13/07/2026).
Deputada Lídia mos la haluha hatoo agradesimentu boot ba saudoza Paula Ferreira Pinto neebe molok nee fo ona ninia kontribuisaun boot iha prosesu luta ba ukun rasik aan.
Iha fatin hanesan, Deputada Bankada Partidu Libertasaun Popular (PLP), Deputada Maria Angelina Sarmento mos reforsa tan katak nia lori Bankada PLP nia naran hatoo mos sentidu kondolensia klean ba Roque Rodrigues neebe lakon ona nia kaben Paula Ferreira Pinto.
“Hau hakarak hatoo mos profunda sentidu kondolensia ba Doutor Roque Rodrigues neebe lakon ona nia kaben senhora Paula Pinto,” dehan Deputada, Maria Angelina Sarmento.
Deputada Maria mos enkoraja Doutor Roque Rodrigues ho familia tomak atu forsa nafatin hodi hasoru situasaun difisil ida nee.
“Hein katak Doutor Roque Rodrigues ho familia bele forsa nafatin hodi hasoru situasaun ida nee,” adianta nia
Saudoza hanesan ativista veterana ida iha luta ba Timor Leste nia independensia. Iha dekada barak nia laran, nia sai hanesan apoiante ida neebe la nakdoko ba luta Timor Leste nian autodeterminasaun.
Nia mos uluk servisu iha Portugal, Europa no fatin seluk ho dedikasaun, profisionalizmu, no sakrifisiu pesoal neebe boot. Iha Timor Leste tempu ukun aan saudoza nuudar tradutora, profisional independente no ativista ba Timor Leste dezde tinan 1976.
Aleinde nee saudoza Paula Ferreira Pinto hakotu iis iha HNGV iha loron Segunda (13/07) hafoin halo tratamentu intensivu ba moras neebe nia iha.
Saudoza Paula Isabel Ferreira Carvalho Pinto, moris iha Reuno Unido nuudar sidadaun Portuguesa, iha loron 10 maiu 1957.
Entretantu iha Segunda, tuku 17:00, familia sira haloot ona Paula Isabel Ferreira Carvalho Pinto iha semiteriu Publiku Bekuse.
Serimonia Funebre nee partisipa husi Prezidente Republika (PR) José Ramos Horta, Eis Primeiru Ministru Mari Alkatiri, Eis Primeiru Ministru Taur Matan Ruak, Xefe Estadu Maior Jenerál FALINTIL-Forsa Defeza Timor Leste (F-FDTL) Tenente Jenerál Domingos Raúl “Falur Rate Laek”, Roque Rodrigues ho familia, deputadu sira inklui eis membru governu sira.
(alb)
