DILI, STLTIMORLESTE.com – Bankada opozisaun iha Parlamentu Nasional (PN) duvidas ho razaun husi Ministeriu Saude (MS) mak dividas iha nasaun Malazia, Singapura no Indonezia, tanba iha audensia MS justifika katak, sei haree invoice hafoin halo pagamentu.
Hatete Deputada Bankada FRETILIN, Nurima Ribeiro Alkatiri ba STL iha HNGV, Kinta (23/1/2025).
Nia dehan, kona-ba dividas nee laos oituan, maibe boot, bankada opozisaun iha PN sempre kestiona dezde iha tinan kotuk.
“Dividas laos oituan, maibe dividas barak, ami mos kestiona beibeik dezde tinan kotuk, mezmu orsamentu 2025 neebe fo hodi halo transferensia ba rai liur, ami haree la too para atu selu devidas neebe iha ona, la hatene agora sira rezolve halo nusa ba problema ida nee, no resposta neebe ami halo durante audensia ho Ministeriu Saude dehan Ministra sei cek hela invoice husi hospital rai liur para atu haree los ka lalos. Hau haree ida ne’e laos justifika neebe mak razoavel para atu bele atraza prosesu neebe kleur,” nia esplika.
Nia informa, se haruka ona pasiente barak ba rai liur tenke selu ema nia servisu, tanba Timor Leste mos hatene hela hospital sira iha rai liur neeba nee oinsa.
Nia koalia, dezde Setembru no Outubru neebe hein hela atu ba halo tratamentu no dala ruma balu mos mate tan tiha ona, karik ida nee grave tebes, tanba bainhira la fo prioridade ba povu nia saude.
Iha fatin hanesan, Prezidente Komisaun F, Maria Gorumali informa, kona-ba dividas iha rai liur nee mak Komisaun F seidauk hetan konfirmasaun husi Ministra Saude kona-ba pasiente pendente nain 78 neebe mak daudaun nee sei hein desizaun.
“Seidauk hetan konfirmasaun ho Ministra, hau labele fo argumentu neebe mak sem faktus. Hau lakohi uza argumentu politika hodi prejudika pasiente sira, hau hanoin la iha kbiit atu too iha neeba, maibe se pasiente hanesan nee duni dadus neebe mak ohin ita boot sira hatene hau presiza halo konfirmasaun ho fali Ministeriu Saude, atu nunee Komisaun F bele haree situasaun ida nee, se karik informasaun los,” nia hatutan.
Nia informa, tanba bainhira iha debate Orsamentu Jeral Estadu (OJE) 2025 PN mos preokupa ho dividas neebe mak Estadu Timor Leste asina MoU ho Hospital Internasional sira.
Tuir verifikasaun dadus ba iha dividas nee, tuir audensia neebe mak iha Komisaun F halo ho Ministeriu Saude katak laos Timor Leste mak prosesu kelur, maibe ema nia hospital mak kleur.
“Orsamentu Jeral Estadu laos ita mak halo prosesu kleur nee lae, maibe husi hospital sira neebe mak hetan MoU ho ita nee mak oferese dadus mai ita nee kleur, tanba nee mak afeta ba iha Governu Timor-Leste liu husi Ministeriu Saude. Ita seidauk bele hatene lo-loos montante ba dividas nee hira, ida nee mak problema neebe mak ami simu kuandu bainhira iha audensia,” nia haktuir.
Nia hatutan, tanba nee Ministeriu Saude sei halo konfirmasaun ho hospital sira nee atu fo resposta lo-loos mai nee mak tarde.
(jen)
