DILI, STLTIMORLESTE.com – Tribunal Judisial Primeira Instansia Dili liu husi desizaun ikus, kondena arguidu CS pena multa, tanba halo agresaun hasoru lezada ho inisial AR.
Iha desizaun loron Segunda nee, Juiz Ivan Suritai deklara katak, faktus neebe konsta iha akuzasaun provadu, bazeia ba deklarasaun husi arguidu no lezada rasik.
Tribunal haree katak, provadu arguidu komete duni krimi neebe Ministeriu Publiku akuza ba, tanba nee maske sira diak malu ona, maibe atu halo prevensaun iha futuru, Tribunal deside hodi aplika pena multa US$ 60 ba arguidu.
Tribunal mos hanoin ba arguidu atu labele halo tan krimi refere iha futuru, no husu arguidu atu la aseita ho desizaun Tribunal nian bele liu nia defeza hodi halo rekursu hasoru desizaun.
Tuir akuzasaun neebe iha katak, iha loron 10 fulan Junhu tinan 2023 arguidu halo agresaun hasoru lezada iha sira nia uma Dare.
Motivu husi mosu agresaun nee tanba momentu lezada simu telefone koalia ho nia kolega feto ida, tanba kolega nee atu empresta osan lezada nian.
Momentu nee lezada koalia ho telefone neineik mak halo arguidu nervozu lori liman tuku kedan dala ida ba iha lezada nia hasan karuk, no lori ain tebe maibe la kona tanba lezada ses aan tiha.
Konsekuensia husi arguidu nia hahalok nee halo lezada sente moras iha nia hasan karuk durante semana rua.
Hahalok arguidu nia ho konsiente rasik, hatene katak hahalok nee lei bandu maibe arguidu halo nafatin.
Tanba nee, konstitui arguidu nuudar autor material ho forma konsumadu ba pratika konkursu krimi Ofensa Integridade Fizika Simples ho forma Violensia Domestika ida previstu no punidu tuir artigu 145 no lei kontra violensia domestika numeru 07/2010.
Audensia julgamentu nee prezide husi Juiz Singular Ivan Suritai, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Manuel Exposto.
(ter)
